بلدی انتخابات میں کانگریس شاندار کامیابی حاصل کرے گی: وزیرصحت تلنگانہ

حیدرآباد: تلنگانہ کے وزیرصحت دامودر راج نرسمہا نے دعویٰ کیا ہے کہ بلدی انتخابات میں کانگریس پارٹی شاندار کامیابی حاصل کرے گی اور ریاست بھر میں 75 سے 80 فیصد نشستیں جیتنے میں کامیاب ہوگی۔

ہفتہ کی رات اندول۔جوگی پیٹ میونسپل انتخابی مہم میں شرکت کے دوران میڈیا سے بات کرتے ہوئے انہوں نے کہا کہ کانگریس کے برسرِ اقتدار آنے کے محض دو سالوں میں کئی ترقیاتی کام انجام دیے گئے ہیں۔

وزیر موصوف نے مزید کہا کہ عوامی حکومت کی فلاحی اسکیمیں، ترقیاتی پروگرام، بلا سود قرضے، تعلیم اور صحت کے شعبوں میں انقلابی تبدیلیاں، خواتین کے لئے مفت بس سروس، گروہا لکشمی اسکیم، جے ای انجینئرنگ کالج، مربوط اسکولوں کی تعمیر، نئے راشن کارڈس کا اجراء اور ملازمتوں پر تقررات حکومت کی اہم کامیابیاں ہیں۔

انہوں نے اندول۔جوگی پیٹ کی ترقی کا ذکر کرتے ہوئے نرسنگ کالج، ہاسٹلس کی تعمیر، کے جی بی وی، ماڈل اسکول، اسکل ڈیولپمنٹ سنٹر، جدید اسپتال اور خواتین کے پالی ٹکنک کالج جیسے منصوبوں پر روشنی ڈالی۔

انہوں نے یقین دلایا کہ آنے والے دنوں میں جوگی پیٹ میں صنعتیں قائم کرنے کے لئے بھرپور کوششیں کی جائیں گی تاکہ خواتین کو روزگار اور ملازمتوں کے مزید مواقع میسر آسکیں۔