کرناٹک میں 6 ضمانتوں پر عمل کا سروے کرنے کے سی آر کو شیوکمار کا چیالنج

حیدرآباد: کرناٹک کے نائب وزیراعلی ڈی کے شیوکمار نے کہا ہے کہ تلنگانہ میں کانگریس کی حکومت بنے گی۔انہوں نے شہرحیدرآباد کے مشیرآباد حلقہ میں انتخابی مہم چلائی۔اس موقع پر روڈشو سے خطاب کرتے ہوئے انہوں نے کہا کہ 5ضمانتوں کا کانگریس کی طرف سے اعلان کرناٹک میں کیاگیا اور 4ضمانتوں پر عمل کو یقینی بنایاگیااورایک ضمانت پر جلد ہی عمل کیاجائے گا۔

جو وعدہ کانگریس نے کرناٹک کے عوام سے کیاتھا،اس کو پوراکیا۔تلنگانہ میں 6ضمانتوں کا اعلان کیاگیا ہے۔انہوں نے کہاکہ وزیراعلی تلنگانہ کے چندرشیکھرراو اور ان کے فرزند کے تارک راما راو عوام سے یہ کہہ رہے ہیں کہ کانگریس کرناٹک میں عوام سے کئے گئے ضمانتوں پر عمل نہیں کررہی ہے۔

انہوں نے ان کو چیالنج کیا کہ وہ کرناٹک آکر دیکھیں، یہ لیڈران اپنے طورپر پڑوسی ریاست میں سروے کرلیں انہیں پتہ چل جائے گا۔جو وعدے کانگریس نے کرناٹک میں کئے ہیں، ایسے تمام وعدوں پر تلنگانہ میں عمل کیاجائے گا۔