دہلی کی وزیر اعلیٰ نے پنک کارڈز سے متعلق افواہوں اور دعوؤں کو مسترد کر دیا، خواتین کو بلا جھجھک سفر کرنے کی ہدایت
دہلی کی وزیر اعلیٰ ریکھا گپتا نے پنک کارڈ ، اس کی کارکردگی اور ایک گھنٹے کے اندر صرف ایک بار استعمال کیے جانے سے متعلق تمام دعوؤں اور افواہوں کو مسترد کر دیا ہے۔ انہوں نے خواتین سے کہا ہے کہ وہ بلا جھجھک اس کارڈ کا استعمال کریں اور جتنی بار چاہیں سفر کریں۔
نئی دہلی: دہلی کی وزیر اعلیٰ ریکھا گپتا نے پنک کارڈ ، اس کی کارکردگی اور ایک گھنٹے کے اندر صرف ایک بار استعمال کیے جانے سے متعلق تمام دعوؤں اور افواہوں کو مسترد کر دیا ہے۔ انہوں نے خواتین سے کہا ہے کہ وہ بلا جھجھک اس کارڈ کا استعمال کریں اور جتنی بار چاہیں سفر کریں۔
اپنے سوشل میڈیا ہینڈل پر جاری ایک ویڈیو پیغام میں محترمہ گپتا نے کہا کہ کچھ سیاسی لوگ سیاسی پروپیگنڈے کے تحت پنک کارڈز کے بارے میں غلط معلومات پھیلا رہے ہیں اور یہ دعویٰ کر رہے ہیں کہ ایک بس میں استعمال کرنے کے بعد یہ کارڈ کچھ دیر تک دوسری بس میں کام نہیں کرتا۔
وزیر اعلیٰ نے ایسے جھوٹے دعوؤں کو قطعی طور پر مسترد کرتے ہوئے دارالحکومت کی خواتین سے کہا ہے کہ وہ بغیر کسی تناؤ کے دن میں جتنی بار ضرورت ہو پنک کارڈ کا استعمال کریں، یہ ہر بار کام کرے گا۔
انہوں نے الزام لگایا کہ یہ جھوٹا پروپیگنڈا اس لیے کیا جا رہا ہے کیونکہ اب اس شعبے میں بھی بدعنوانی کی کوئی گنجائش باقی نہیں رہی۔ بسوں میں کیے جانے والے سفر کا باقاعدہ اندراج کیا جائے گا تاکہ حکومت سفر کی اصل تعداد کے مطابق ادائیگی کرے، نہ کہ کسی سرسری اندازے یا غیر حساب شدہ طریقے سے۔
عام آدمی پارٹی (اے اے پی) پر تنقید کرتے ہوئے وزیر اعلیٰ نے کہا کہ اب انہیں شہر کی بیٹیوں کو سائیکلیں فراہم کیے جانے پر بھی اعتراض ہے، تو وہ پنک کارڈ کو اتنی آسانی سے کیسے قبول کریں گے۔ دہلی کی خواتین کے لیے وزیر اعلیٰ نے کہا، "مفت سفر کے لیے بس کارڈ ٹیپ کریں اور فکر مند نہ ہوں۔”
انہوں نے اس بات پر زور دیا کہ خواتین مسافر پنک کارڈ کو آزادانہ طور پر استعمال کر سکتی ہیں، مثال کے طور پر اگر انہیں بس بدلنی پڑے تو وہ دوسری بس میں سوار ہو کر دوبارہ کارڈ ٹیپ کر سکتی ہیں اور یہ کام کرے گا۔
