اسرائیل کو ہتھیاروں کی اندھادھند سربراہی پر اعتراض کرتے ہوئے امریکی محکمہ خارجہ کے ڈائرکٹر نے استعفیٰ دے دیا

واشنگٹن: اسرائیل کو اسلحے کی فراہمی پر اختلاف کے باعث امریکی محکمہ خارجہ کے ڈائریکٹر نے اپنے عہدے سے استعفیٰ دے دیا۔

بین الاقوامی خبر رساں ادارے کی رپورٹ کے مطابق امریکی محکمہ خارجہ کے ڈائریکٹر جاش پال نے اسرائیل کو ہتھیاروں کی منتقلی میں تیزی لانے کے فیصلوں سے اختلافات کیا تھا۔

جاش پال کا کہنا ہے میں کئی اہم پالیسی فیصلوں کی حمایت میں کام نہیں کرسکتا، جن میں تنازع کے ایک فریق کو مزید ہتھیار فراہم کرنا بھی شامل ہے۔

انہوں نے کہا کہ یہ تنگ نظری، تباہ کن، غیرمنصفانہ اور ان اقدار سے متصادم ہے جن کی ہم عوامی طور پر حمایت کرتے ہیں، اسرائیل کے ردعمل سے اسرائیلیوں اور فلسطینیوں کیلئے مزید اور گہرے مصائب پیدا ہوں گے۔

دوسری جانب جنگی جنون میں مبتلا اسرائیل نے سفاکیت کی انتہا کردی ہے، غزہ میں چوبیس گھنٹے بعد ایک اور اسپتال کو نشانہ بنایا گیا ہے، القدس اسپتال کے اطراف بمباری کی گئی ہے۔

القدس اسپتال میں آٹھ ہزار سے زائد فلسطینیوں نے پناہ لے رکھی ہے، صہیونی ریاست نے 2009 میں بھی القدس اسپتال کو نشانہ بنایا تھا۔

غزہ میں الشفا اسپتال کے نواحی علاقے کو بھی بمباری کا نشانہ بنایا گیا، اسپتال زخمیوں سے بھرے ہوئے ہیں، ڈاکٹرز کا کہنا ہے زخمیوں میں 40 فیصد تعداد بچوں کی ہے۔