ایلون مسک کا ایپل پر ’اینٹی ٹرسٹ‘ قوانین کی خلاف ورزی کا الزام، قانونی کارروائی کا اعلان

سان فرانسسکو: ارب پتی صنعتکار، ٹیسلا اور ایکس کے مالک، ایلون مسک نے الزام عائد کیا ہے کہ ایپل اپنی ایپ اسٹور پالیسیوں کے ذریعے مصنوعی ذہانت (اے آئی) کمپنیوں کے مقابلے کو محدود کر رہا ہے۔

ایلون مسک نے اپنے مائیکرو بلاگنگ ویب سائٹ ’ایکس‘ اکاؤنٹ پر جاری کیے گئے پیغام میں کہا کہ ایپل صرف اوپن اے آئی کو سب سے آگے رکھ رہا ہے، ایپل کا یہ عمل واضح طور پر اینٹی ٹرسٹ قوانین کی خلاف ورزی ہے۔

مسک نے مزید لکھا کہ ایپل اس انداز میں برتاؤ کر رہا ہے کہ اوپن اے آئی کے علاوہ کوئی بھیاے آئی کمپنی ایپ اسٹور میں نمبر ون نہیں بن سکتی جو کہ ’اینٹی ٹرسٹ قوانین‘ کی صاف خلاف ورزی ہے، ایکس اے آئی فوری طور پر اس معاملے پر قانونی کارروائی کرے گا۔

بین الاقوامی میڈیا رپورٹس کے مطابق ایلون مسک نے اپنے اس دعوے کے حق میں کوئی ثبوت فراہم نہیں کیا ہے جبکہ ایپل، اوپن اے آئی اور مسک کی کمپنی ایکس اے آئی نے اس معاملے پر فوری طور پر کوئی تبصرہ بھی نہیں کیا ہے۔

ایک رپورٹ کے مطابق ایپ اسٹور کے امریکی ’ٹاپ فری ایپس‘ سیکشن میں اس وقت چیٹ جی پی ٹی (ChatGPT) پہلے نمبر پر ہے۔

مارکیٹ ریسرچ کمپنی سینسر ٹاور (Sensor Tower) کے اعداد و شمار کے مطابق چیٹ جی پی ٹی گوگل پلے اسٹور پر بھی سب سے آگے ہے۔

دوسری جانب مسک کا اے آئی چیٹ بوٹ ’گروک‘ پانچویں نمبر پر اور گوگل کا ’جیمنی‘ 57ویں نمبر پر ہے۔

میڈیا رپورٹس کے مطابق ایپل کی اوپن اے آئی کے ساتھ شراکت داری ہے جس کے تحت چیٹ جی پی ٹی کو آئی فون، آئی پیڈ اور میک ڈیوائسز میں ضم کیا گیا ہے۔