ہر گھر ملازمت کا وعدہ کے سی آر نے پورا نہیں کیا: ریونت ریڈی

حیدرآباد: تلنگانہ کانگریس کے سربراہ ریونت ریڈی نے کہا ہے کہ اگر ہم آئندہ اسمبلی انتخابات میں ضلع کھمم سے دس میں سے دس حلقوں پر کامیابی حاصل کرتے ہیں تو ہمیں ریاست میں 90 نشستیں حاصل ہوں گی۔

انہوں نے کل رات کھمم میں تلنگانہ پردیش کانگریس کمیٹی کے زیر اہتمام بے روزگاری احتجاجی ریلی سے خطاب کرتے ہوئے کہا کہ ہر گھر کو ملازمت دینے کا وعدہ کرنے والے وزیر اعلیٰ نے گاؤں میں ایک بھی ملازمت نہیں دی۔

 انہوں نے کہا کہ ریاست میں کانگریس کی حکومت بننے سے ہی بے روزگاری کا مسئلہ حل ہوگا۔ انہوں نے کہا کہ تحریک کے جذبہ کے ساتھ ریاست بھر میں بے روزگاری کے مسئلہ کے خلاف جدوجہد کی جائے گی۔انہوں نے کہاکہ بسوا کمیشن کے مطابق تلنگانہ کی تشکیل کے بعد 1.07 لاکھ ملازمتیں مخلوعہ تھیں۔

چیف منسٹر کے چندرشیکھرراو نے یقین دہانی کروائی تھی کہ وہ ان تمام ملازمتوں کو پُر کریں گے تاہم9 سالوں میں اس مسئلہ کو نظرانداز کردیاگیا۔انہوں نے کہاکہ تلنگانہ کی تشکیل کے بعد ملازمتوں کی تعداد میں بھی اضافہ ہوا ہے۔

 ریونت ریڈی نے کہا کہ چندرشیکھرراو ریاست کے 50 لاکھ بے روزگاروں، طلباء اور نوجوانوں کی زندگیوں سے کھلواڑ کر رہے ہیں۔ اس پروگرام میں کانگریس پارٹی کے سینئر لیڈران،پارٹی کارکنوں نے شرکت کی۔