آندھراپردیش میں ”ماں کے دودھ کا پہلا بینک“قائم

حیدرآباد: آندھراپردیش میں ”ماں کے دودھ کا پہلا بینک“قائم کیاگیا ہے جس کا افتتاح گذشتہ روز کاکناڈا کی کلکٹر کریتیکا شکلا نے انجام دیا۔اس بینک کو دھاتری لیکٹیشن مینجمنٹ یونٹ کا نام دیاگیا ہے جو گورنمنٹ جنرل اسپتال (جی جی ایچ کاکناڈا)میں قائم کیاگیا ہے۔

اس ملک بینک کے قیام کا مقصد اسپتال کے ایمرجنسی میڈیکل کیر میں نوزائیدہ بچوں کو ماوں کا دودھ فراہم کرتے ہوئے ماں کی دودھ کی اہمیت کو اجاگرکرنا ہے۔کلکٹرنے اس موقع پر کہاکہ دودھ پلانے والی ماوں سے دودھ حاصل کرتے ہوئے اس بینک میں رکھاجائے گا۔

اس بینک کے قیام کو سوسیہنا ہیلت فاونڈیشن اور دھاتری فاونڈیشن کے تقریبا 50لاکھ روپئے کے فنڈس سے ممکن بنایاگیا ہے۔انہوں نے کہاکہ اس اسپتال میں پیدانوزائیدہ بچے جن کو علاج کے دوران ماں کے دودھ کی ضرورت ہوتی ہے،کو قبل ازیں دوسرے قسم کا دودھ فراہم کیاجاتا تھا تاہم اس بینک کے قیام سے ان کو صحت مندی کیلئے ماوں کا دودھ فراہم کرناممکن ہوسکے گا۔

ساتھ ہی 6ماہ تک کے بچوں کو ماں کا دودھ فراہم کرنے کی حوصلہ افزائی کی جاسکے گی۔آندھراپردیش میں اس طرح کے بینک کا قیام اس علاقہ میں ماوں اور بچوں کی صحت مندی وبہتری کو یقینی بنانے میں مددگار ثابت ہوسکتا ہے۔