سوریا پیٹ گورنمنٹ نرسنگ کالج ہاسٹل میں فوڈ پوائزننگ کا واقعہ، 13 طالبات اسپتال منتقل

سوریہ پیٹ: تلنگانہ کے سوریہ پیٹ گورنمنٹ نرسنگ کالج ہاسٹل میں مبینہ فوڈ پوائزننگ کے واقعے کے بعد 13 طالبات اچانک شدید علیل ہو گئیں۔ متاثرہ طالبات کو پیٹ میں شدید درد، قے اور اسہال کی شکایت کے بعد فوری طور پر سوریہ پیٹ ایریا اسپتال منتقل کیا گیا، جہاں ان کا علاج جاری ہے۔

اطلاعات کے مطابق طالبات کی طبیعت خراب ہونے کے بعد انہیں ابتدائی طبی امداد فراہم کی گئی، تاہم حالت بگڑنے پر انہیں اسپتال منتقل کرنا پڑا۔

واقعے کے بعد ہاسٹل کی طالبات نے انتظامیہ پر لاپرواہی کا الزام عائد کرتے ہوئے کہا کہ گزشتہ چند دنوں سے کئی طالبات بخار اور دیگر صحت سے متعلق مسائل کے باعث ہاسٹل چھوڑ رہی ہیں، لیکن اس کے باوجود متعلقہ عملہ صورتحال پر خاطر خواہ توجہ نہیں دے رہا۔

طالبات نے ہاسٹل کے اطراف صفائی کے ناقص انتظامات اور غیر معیاری کھانے کی فراہمی پر بھی شدید ناراضی کا اظہار کیا۔ ان کا کہنا ہے کہ ہاسٹل میں صفائی کی مناسب سہولیات موجود نہیں ہیں اور فراہم کیا جانے والا کھانا معیاری نہیں، جس کے باعث طلبہ کی صحت متاثر ہو رہی ہے۔

واقعے کی اطلاع کے بعد متعلقہ حکام نے معاملے کی جانچ شروع کر دی ہے۔ توقع ہے کہ فوڈ سیمپلز، ہاسٹل کچن اور صفائی کے انتظامات کا معائنہ کیا جائے گا تاکہ طالبات کی بیماری کی اصل وجہ معلوم کی جا سکے۔

اسپتال ذرائع کے مطابق تمام متاثرہ طالبات زیرِ علاج ہیں اور ان کی حالت مستحکم بتائی جا رہی ہے، جبکہ واقعے کی مزید تحقیقات جاری ہیں۔