حقوق العباد کی ادائیگی—صالح اور خوبصورت معاشرے کی بنیاد

حیدرآباد: جماعت اسلامی ہند یاقوت پورہ کے زیر اہتمام گرینڈ فیسٹیول پیالس، سنتوش نگر میں حقوقِ ہمسایہ مہم کا اختتامی خصوصی اجتماع عام منعقد ہوا، جس میں مرد و خواتین، طلبہ و طالبات کی کثیر تعداد نے شرکت کی۔

رکن مرکزی مجلس شوریٰ جماعت اسلامی ہند اور ہفت روزہ دعوت کے ایڈیٹر پروفیسر فہیم الدین احمد نے خطاب کرتے ہوئے کہا کہ امت کی تعمیر کے لیے سب سے پہلے اسے مایوسی، احساسِ کمتری اور محرومی کے ذہنی بوجھ سے آزاد کرنا ضروری ہے۔ انہوں نے امت کے اجتماعی کردار کو اسلامی تعلیمات کے مطابق مضبوط بنیادوں پر استوار کرنے پر زور دیا۔

پروفیسر فہیم الدین نے کہا کہ امت میں علمی مزاج پیدا ہونا چاہیے، افراد علم کے شوقین ہوں اور علم کو اپنی ترجیحات میں مقدم رکھیں۔ انہوں نے مثبت سیاست اور ہر ظلم و ناانصافی کے خلاف فعال شراکت کی ضرورت پر بھی زور دیا۔

معاون امیر حلقہ جماعت اسلامی ہند تلنگانہ مولانا محمد عبدالرقیب حامد لطیفی نے مسلمانوں کے باہمی تعلقات، خود شناسی، خدا شناسی اور حقوق اللہ و حقوق العباد کی ادائیگی کو ایک صالح اور خوبصورت معاشرے کی بنیاد قرار دیا۔ انہوں نے کہا کہ جب انسان اپنے رب کو پہچانتا ہے اور بندوں کے حقوق کو قرآن و سنت کے مطابق ادا کرتا ہے تو معاشرہ سنورتا ہے اور ایسی بستیوں پر اللہ کی رحمتیں نازل ہوتی ہیں۔

امیر مقامی جماعت اسلامی ہند یاقوت پورہ محمد فاروق طاہر نے افتتاحی کلمات پیش کرتے ہوئے امت مسلمہ کو اپنے فرض منصبی کی ادائیگی اور امر بالمعروف و نہی عن المنکر کو اجتماعی اصلاح کا بنیادی ذریعہ قرار دیا۔ انہوں نے بتایا کہ مہم کے دوران یاقوت پورہ کی کئی مساجد میں مسلسل دو جمعہ حقوق ہمسایہ کے موضوع پر خطبات جمعہ پیش کیے گئے، جبکہ اسکولوں میں تحریری، تقریری اور ڈرائنگ کے مقابلے بھی منعقد ہوئے۔ ان مقابلوں میں 470 طلبہ و طالبات نے حصہ لیا اور 54 طلبہ کو اول، دوم اور سوم انعامات کے ساتھ ترغیبی انعامات اور سرٹیفکیٹس بھی پیش کیے گئے۔

پروگرام کا آغاز محمد سلمان فضیلت کی تلاوت کلامِ پاک اور ترجمانی سے ہوا۔ نظامت کے فرائض رکن شوریٰ یاقوت پورہ محمد کلیم الدین نے خوش اسلوبی سے انجام دیے۔ اجتماع میں مولانا محمد عبد الحفیظ عظیمی، معاون امیر مقامی جناب محمد ذکی الدین، تنظیمی سکریٹری جناب عبد المجیب صہیب، جناب مقصود ہاشمی اور دیگر معززین بھی موجود تھے۔

اس اجتماع کے دوران واضح کیا گیا کہ جماعت اسلامی ہند دعوت، اصلاح، تزکیہ اور خدمت خلق کے مشن کے ساتھ اپنا کام جاری رکھے ہوئے ہے اور معاشرتی اصلاح و بھلائی کے لیے مستعدی کے ساتھ کام کر رہی ہے۔