کلکٹرسدی پیٹ کے گن مین نے بیوی، بچوں کو ہلاک کرنے کے بعد خودکشی کرلی
بتایا جاتا ہے کہ نریش، جمعہ کو نوکری پر نہیں گیا تھا اور وہ مکان میں مقیم تھا، فائرنگ کی آواز سن کر پڑوسی فوری پہونچے تو دیکھا کہ چاروں مرچکے تھے۔
حیدرآباد: ضلع کلکٹر سدی پیٹ کے سیکورٹی گارڈ نے خودکشی سے قبل اپنی بیوی اور دوبچوں کو گولی مارکر ہلاک کردیا۔ ضلع کے چنا کڈور منڈل کے موضع رامونی پیٹ میں جمعہ کے روز یہ واقعہ پیش آیا۔
پولیس کے مطابق35 سالہ پولیس کانسٹبل آکولہ نریش، ضلع کلکٹر پرشانت جیون پاٹل کے گن مین کے طور پر کام کررہا تھا۔ نریش نے پہلے اپنی اہلیہ30 سالہ چیتنیہ،6 سالہ فرزند ریونت اور5 سالہ ہیما شری پرپستول سے فائرنگ کردی بعدازاں اُس نے اپنی گن سے خود کو گولی مارکر خودکشی کرلی۔
بتایا جاتا ہے کہ نریش، جمعہ کو نوکری پر نہیں گیا تھا اور وہ مکان میں مقیم تھا، فائرنگ کی آواز سن کر پڑوسی فوری پہونچے تو دیکھا کہ چاروں مرچکے تھے۔ مقامی افراد نے پولیس کو الرٹ کیا۔ پولیس نے پہونچنے کے بعد لاشوں کو پوسٹ مارٹم کیلئے ہاسپٹل منتقل کردیا۔
کیس درج کرتے ہوئے پولیس نے تحقیقات کا آغاز کردیا۔ مالی مسائل، اس واقعہ کا اہم سبب بتایاگیا ہے۔ مقامی افراد کے مطابق نریش، آن لائن سٹہ کھیلنے کا عادی تھا اور اُس نے دوسروں سے بھاری قرض لے رکھا تھاتاہم پولیس نے کہا کہ وہ ہر زاویہ سے تحقیقات کررہی ہے۔
