سودیس فلم کی ہیروئن گائتری جوشی کی کار سے اٹلی میں بھیانک سڑک حادثہ (خوفناک ویڈیو وائرل)

ممبئی: بالی ووڈ کے ’بادشاہ‘ اداکار شاہ رخ خان کے ساتھ فلم ’سودیس‘ میں نظر آنے والی اداکارہ گایتری جوشی اور ان کے شوہر وکاس اوبرائے کی گاڑی اٹلی میں سفر کے دوران حادثے کا شکار ہوگئی۔

حادثے کے وقت گایتری اور اس کے شوہر وکاس سردینا میں چھٹیاں منا رہے تھے۔ بتایا جاتا ہے کہ گایتری اور وکاس کی کار کئی کاروں اور ایک کیمپر گاڑی سے ٹکرا گئی۔ وکاس اوبرائے کے منیجر کے مطابق میاں بیوی محفوظ ہیں۔

حادثہ Sardinia Supercar Tour کے دوران پیش آیا، جو Teulada سے Olbia تک لگژری کار پریڈ تھی۔ گایتری جوشی اور ان کے شوہر وکاس اوبرائے اپنی لیمبورگینی کار میں سفر کر رہے تھے جب ان کی لگژری کار فراری اور کیمپر گاڑی سے ٹکرا گئی۔

یہ تصادم سارڈینیا کی دیہی سڑک پر پیش آیا جس کے نتیجے میں گاڑیاں الٹ گئیں اور متعدد گاڑیاں ایک دوسرے سے ٹکرا گئیں۔ میڈیا رپورٹس کے مطابق فراری کار میں آگ لگ گئی جس کے نتیجے میں اس میں سوار 63 سالہ میلیسا کروٹلی اور 67 سالہ مارکس کروٹلی ہلاک ہوگئے۔ کروٹلی جوڑا اصل میں سوئٹزرلینڈ کا رہائشی تھا۔

ناگپور، مہاراشٹر میں پیدا ہونے والی گایتری جوشی نے اپنے کیرئیر کا آغاز بطور ویڈیو جاکی کیا، اور پھر فیمینا مس انڈیا بیوٹی مقابلہ جیتنے کے مقصد سے سخت محنت شروع کر دی۔

 سال 2000 میں، گایتری نے فیمینا مس انڈیا انٹرنیشنل کا ٹائٹل جیتا اور مس انٹرنیشنل 2000 کے مقابلے میں ہندوستان کی نمائندگی کی۔ گایتری نے پھر 2004 کی فلم ‘سودیس’ میں کام کیا، جس کی ہدایت کاری آشوتوش گواریکر نے کی تھی، یہ ایک این آر آئی ناسا انجینئر کی کہانی تھی جو ہندوستان کے ساتھ اپنے تعلق کو جانچنے کے لیے ہندوستان واپس آتا ہے۔ فلم کی بہت تعریف کی گئی، اور گایتری جوشی کو بھی ان کی ‘بالغ’ اداکاری کے لیے سراہا گیا۔

گایتری جوشی نے 2005 میں بزنس مین وکاس اوبرائے سے شادی کی۔ گایتری جوشی ایک اشتہاری ماڈل کے طور پر بھی کام کر چکی ہیں اور کئی میوزک ویڈیوز میں نظر آ چکی ہیں، جن میں ہنس راج ہنس کی ‘جھانجھریا’ اور جگجیت سنگھ کی ‘کاغذ کی کشتی’ شامل ہیں۔