حیدرآباد دواؤں کا مرکز بن گیا: گورنر تلنگانہ

حیدرآباد: تلنگانہ کی گورنر تمیلی سائی سوندراراجن نے کہا ہے کہ حیدرآباد دواوں کا مرکز بن گیا ہے۔ انہوں نے راج بھون میں کینسر بیداری پروگرام سے خطاب کرتے ہوئے طبی عملے کی خدمات کی ستائش کی۔ انہوں نے کہا کہ خاص طور پر کورونا کے دوران صحت کے عملہ کی طرف سے فراہم کردہ خدمات ناقابل فراموش ہیں۔

 انہوں نے کہا کہ ریاستی بجٹ میں محکمہ صحت کیلئے ریکارڈ سطح پر 12,161 کروڑ روپے مختص کئے گئے ہیں جو خوش آئند ہے۔ انہوں نے کہا کہ محکمہ صحت کو گزشتہ سال کے مقابلے 721 کروڑ روپئے زیادہ مختص کئے گئے ہیں، اس سے تلنگانہ کے عوام کو مزید فائدہ ہوگا۔

گورنر نے کہا کہ وہ میڈیکل کے شعبہ میں مزید انقلابی تبدیلیاں لانے کی امید رکھتے ہیں۔انہوں نے اضلاع میں نرسنگ کالجوں کامیڈیکل کالجوں کے ساتھ الحاق کرنے کے اعلان پر خوشی کا اظہار کیا۔ انہوں نے کہا کہ مرکزی حکومت کی اسکیموں کے ذریعہ غریبوں کو بہتر علاج مل رہا ہے۔