سعودی ولی عہد سے ایرانی وزیرخارجہ کی اہم ملاقات

ریاض: سعودی عرب میں ایرانی وزیرخارجہ عباس عراقچی نے سعودی ولی عہد و وزیراعظم شہزادہ محمد بن سلمان سے ریاض میں ملاقات کی۔ سعودی خبر رساں ادارے کے مطابق ایرانی وزیرخارجہ اور سعودی ولی عہد کے درمیان ہونے والی ملاقات میں خطے کی صورتحال اور اس حوالے سے کی جانے والی کوششوں پر تبادلہ خیال کیا گیا۔ اس کے علاوہ اس دوران سعودی عرب اور ایران کے دوطرفہ تعلقات کا جائزہ لیا گیا۔

اس اہم ملاقات کے موقع پر سعودی وزیر دفاع شہزادہ خالد بن سلمان، وزیرخارجہ شہزادہ فیصل بن فرحان، وزیر مملکت، کابینہ کے رکن اور قومی سلامتی کے مشیر ڈاکٹر مساعد بن محمد العبیان موجود تھے۔

ایران کی جانب سے مملکت میں ایرانی سفیر علی رضا عنایتی اور ایرانی وزارت خارجہ کے اعلی عہدیدار بھی شریک ہوئے۔ اس سے قبل ایرانی وزیر خارجہ عباس عراقچی سے سعودی ہم منصب شہزادہ فیصل بن فرحان کی ملاقات ہوئی تھی۔

رپورٹس کے مطابق اس اہم ملاقات کے دوران مملکت اور ایران کے تعلقات اور مختلف شعبوں میں انہیں فروغ دینے کے طریقوں پر تفصیلی غور کیا گیا۔ دونوں ممالک کے وزرائے خارجہ نے خطے کی صورتحال اور اس حوالے سے کی جانے والی کوششوں پر بھی تبادلہ خیال کیا۔