ہیلمٹ نہ پہننے پر سرکاری ملازمین کو دفتر میں انٹری نہیں

لکھنو: اترپردیش میں ہیلمٹ کے بغیر ٹو وہیلر چلاکر دوسری مرتبہ دفتر پہنچنے والے سرکاری ملازمین کو انٹری نہیں دی جائے گی اور غیرحاضری ڈالی جائے گی۔

یہ پہل 17 جولائی تا 31 جولائی ریاست گیر روڈ سیفٹی مہم کا حصہ ہے۔

حکومت کے ترجمان نے کہا کہ چیف منسٹر یوگی آدتیہ ناتھ کی ہدایت پر روڈ سیفٹی پندرہواڑہ منایا جارہا ہے۔

مہم کا مقصد سڑک حادثات کی تعداد گھٹانا ہے۔ غور طلب ہے کہ سال ِ گزشتہ کے مقابلہ سڑک حادثہ میں 5.5 فیصد اور اموات میں 4.2 فیصد اضافہ ہوا۔

مہم میں متعلقہ محکموں کے عہدیدار بھی حصہ لیں گے۔ بس‘ ٹرک‘ آٹو یونینوں اور ٹرانسپورٹ سے جڑی غیرسرکاری تنظیموں (این جی اوز) کے عہدیداروں کو بھی بلایا جائے گا اور ان کی رائے لی جائے گی۔