جے انمول امبانی سی بی آئی تحقیقات میں مسلسل دوسرے دن شامل، 228 کروڑ روپے بینک لون فراڈ کیس

نئی دہلی: انل امبانی کے بیٹے جے انمول امبانی مسلسل دوسرے دن سی بی آئی کی تحقیقات میں شامل ہوں گے۔ یہ تحقیقات ریلائنس ہوم فنانس لمیٹڈ اور دیگر کے خلاف درج 228 کروڑ روپے کے بینک لون فراڈ کیس سے متعلق ہیں۔

جمعہ کو انہیں پہلی بار تقریباً ساڑھے چھ گھنٹے تک سی بی آئی نے پوچھ گچھ کی۔ بیان درج کرنے کے بعد انہیں جانے کی اجازت دی گئی، لیکن ہفتہ کو دوبارہ خصوصی ٹیم کے سامنے پیش ہونے کے لیے کہا گیا ہے۔

یہ کیس وفاقی تحقیقاتی ایجنسی نے 6 دسمبر 2025 کو درج کیا تھا۔ جے انمول امبانی، رویندرا سدھالکر، نامعلوم افراد اور غیر شناختہ سرکاری اہلکاروں کو ملزم کے طور پر نامزد کیا گیا ہے۔

ایک سینئر سی بی آئی افسر نے بتایاکہ "جے جمعہ کو تحقیقاتی افسر کے سامنے پیش ہوئے اور تقریباً ساڑھے چھ گھنٹے تک ان سے پوچھ گچھ کی گئی۔ مزید جانچ کے لیے انہیں ہفتہ کو بھی پیش ہونے کی ہدایت دی گئی ہے۔”

سی بی آئی نے ریلائنس ہوم فنانس لمیٹڈ (ریلیانس اے ڈی اے گروپ کی کمپنی)، اس کے پروموٹرز/ڈائریکٹرز اور نامعلوم بینک افسران کے خلاف یونین بینک آف انڈیا کی شکایت پر مجرمانہ مقدمہ درج کیا۔ شکایت میں مجرمانہ سازش، دھوکہ دہی اور بدعنوانی کا الزام لگایا گیا ہے، جس سے یونین بینک آف انڈیا (سابق آندھرا بینک) کو 228.06 کروڑ روپے کا نقصان ہوا۔

ریلائنس ہوم فنانس لمیٹڈ کا اکاؤنٹ 2019 میں این پی اے (غیر منافع بخش اثاثہ) قرار دیا گیا تھا اور 2024 میں یونین بینک آف انڈیا نے اسے فراڈ کے طور پر درجہ بند کیا۔ کمپنی نے 18 بینکوں، مالیاتی اداروں، این بی ایف سیز اور کارپوریٹ اداروں سے کل 5,572.35 کروڑ روپے کے قرضے حاصل کیے تھے۔ اس بات کی تحقیقات جاری ہے کہ کمپنی نے کس طرح متعدد بینکوں اور مالیاتی اداروں کو دھوکہ دیا۔

2025 کے اوائل میں سی بی آئی نے ممبئی میں خصوصی جج کی عدالت سے سرچ وارنٹ حاصل کیے اور ریلائنس ہوم فنانس لمیٹڈ کے دو دفتری مقامات، جے انمول امبانی کی رہائش گاہ اور رویندرا سدھالکر (سابق سی ای او اور ڈائریکٹر) کے گھر پر چھاپے مارے۔ ان چھاپوں کے دوران کئی اہم دستاویزات ضبط کی گئیں۔