روز گار میلہ۔ وزیر اعظم کی نگرانی میں دس لاکھ ملازمتیں فراہم کرنے کا عمل جاری

حیدرآباد: مرکزی وزیر سیاحت جی کشن ریڈی نے کہا ہے کہ سرکاری ملازمتوں پر تقررات میں بدعنوانی کے بغیر روز گار میلہ کے ذریعہ وزیر اعظم نریندر مودی کی نگرانی میں دس لاکھ نوجوانوں کو ملازمتیں فراہم کرنے کا عمل جاری ہے۔

وزیر موصوف نے متنبہ کیا کہ بھرتی کے عمل میں بدعنوانی کے مرتکب پائے جانے والوں کے خلاف سخت کارروائی کی جائے گی۔کشن ریڈی نے آج صبح حیدرآباد سے چھٹے روز گر میلے میں شرکت کی۔

انہوں نے تلنگانہ کے 270 سے زائد نئے ملازمت کرنے والے نوجوانوں کو تقررنامے حوالے کئے۔

انہوں نے کہا کہ نوجوان ملک کی ترقی اور دنیا کی ترقی میں اہم کردار ادا کریں گے۔

انہوں نے نئے ملازمت کرنے والے نوجوانوں کو مشورہ دیا کہ وہ مرکزی حکومت اور مختلف مرکزی اداروں کے ذریعہ خدمات انجام دینے کے موقع سے فائدہ اٹھائیں۔

انہوں نے کہا کہ نوجوانوں کو نئی ملازمتیں ملنے سے ہندوستان کو ترقی یافتہ ملک بنانے کی کوششوں کو مزید تقویت ملے گی۔اس موقع پر وزیر موصوف نے گزشتہ 9 سالوں میں ملک کی کامیابیوں کا ذکر کیا۔

یہ کہتے ہوئے کہ یہ میلہ مختلف سرکاری محکموں اور اداروں میں خالی ملازمتوں کو پُر کرنے کے لیے منعقد کیاگیا ہے، انہوں نے نشاندہی کی کہ 70 ہزارملازمتوں کو مرحلہ وار طورپر پُر کیاجائے گا۔