تین ریاستوں کے وزرائے اعلیٰ کیساتھ کے سی آر کی ناشتہ پر ملاقات

حیدرآباد: تلنگانہ کے چیف منسٹرکے چندر شیکھر راؤنے چہارشنبہ کے روزناشتہ پر تین ریاستوں کے وزرائے اعلیٰ اورمختلف سیاسی جماعتوں کے قائدین کے ساتھ تبادلہ خیال کیا۔ یہ قائدین کھمم میں بی آرایس کے افتتاحی جلسہ میں شرکت کے لئے یہاں آئے ہوئے ہیں۔

چیف منسٹرکی ناشتہ کی دعوت میں دہلی کے چیف منسٹر اروندکیجریوال ‘پنجاب کے چیف منسٹربھگونت سنگھ مان‘کیرالا کے چیف منسٹرپنارائے وجین کے علاوہ اترپردیش کے سابق چیف منسٹر اکھلیش یادو‘سی پی آئی کے قومی جنرل سکریٹری ڈی راجہ اور دیگر قائدین نے شرکت کی۔

ناشتہ کی ضیافت کا چیف منسٹر کی سرکاری رہائش گاہ پرگتی بھون میں اہتمام کیاگیاتھا۔ بی آرایس کے عوامی جلسہ میں شرکت کے لئے یہ قائدین منگل کی شب حیدرآباد پہونچے تھے۔

 پرگتی بھون میں چیف منسٹرنے مہمانوں کاپرتباک خیرمقدم کیا اور انہیں پھول اورشال پیش کئے۔ سمجھا جاتا ہے کہ بی آرایس سربراہ نے تین ریاستوں کے ہم منصب اور دیگر قائدین کے ساتھ قومی سیاست پرتبادلہ خیال کیا۔