بالی ووڈ کے کنگ شاہ رخ خان 58 سال کے ہوگئے

ممبئی: مشہور بالی ووڈ اداکار شاہ رخ خان آج 58 سال کے ہو گئے ہیں۔ دو نومبر 1965 کو دہلی میں پیدا ہونے والے شاہ رخ خان کے والد ٹرانسپورٹ کے کاروبار سے وابستہ تھے۔

 اداکاری میں شامل ہونے اور مواصلات کی مختلف شکلوں کو بہتر طور پر سمجھنے کے لیے، شاہ رخ نے جامعہ ملیہ اسلامیہ یونیورسٹی سے اپنی پوسٹ گریجویشن مکمل کی۔ سال 1988 میں شاہ رخ خان نے چھوٹے پردے کے سیریل فوجی سے بطور اداکار اپنے کیریئر کا آغاز کیا۔

سال 1991 میں شاہ رخ اپنے خوابوں کو پورا کرنے کے لئے ممبئی آئے۔ عزیز مرزا نے شاہ رخ خان کی صلاحیتوں کو پہچانا اور انہیں اپنے سیریل سرکس میں کام کرنے کا موقع دیا۔

 ان دنوں ہیما مالنی اپنی فلم دل آشنا ہے کے لیے دیویا بھارتی کے اپوزٹ ایک نئے چہرے کی تلاش میں تھیں۔ جب شاہ رخ خان کو اس بات کا علم ہوا تو وہ اپنے دوستوں کی مدد سے اس فلم کے لیے اسکرین ٹیسٹ دینے گئے اور انہیں منتخب کرلیا گیا۔

اسی دوران شاہ رخ کو فلم دیوانہ میں کام کرنے کا موقع ملا۔ رشی کپور جیسے تجربہ کار اداکار کی موجودگی میں بھی شاہ رخ خان نے اپنی زبردست اداکاری سے شائقین کو اپنا دیوانہ بنایا جس کے لیے فلم فیئرکی طرف سے انہیں نئے اداکار کا فلم فیئر ایوارڈ بھی ملا۔

 اس دوران ہدایتکار جوڑی عباس-مستان نے شاہ رخ خان پر نظریں جمائیں۔ اس وقت وہ ایک انگریز رئیس پر فلم بنانا چاہتے تھے، ’اے کس بفور ڈیتھ‘ پرایک فلم بنانا چاہتے تھے۔

اس فلم میں شاہ رخ خان کے کردار میں گرے شیڈز تھے۔ شاہ رخ نے اسے ایک چیلنج کے طور پر لیا اور اس سے اتفاق کیا۔ سال 1993 میں ریلیز ہونے والی فلم بازیگر سپر ہٹ ثابت ہوئی اور وہ کافی حد تک انڈسٹری میں اپنا نام بنانے میں کامیاب ہوگئے۔