لالو یادو دہلی روانہ، کہا نریندر مودی کو الوداع کہنے کی کرانی ہے تیاری

پٹنہ: آر جے ڈی سربراہ لالو یادو جمعرات کی صبح دہلی کے لئے روانہ ہو گئے۔ روانگی سے قبل انہوں نے اپوزیشن اتحاد کے اجلاس میں شرکت کا وعدہ کیا۔ انہوں نے کہا کہ مرکز سے بی جے پی کا تخت جانا یقینی ہے۔

آر جے ڈی سربراہ لالو یادو نے رخصت ہوتے وقت کہا کہ ابھی میں جانچ کے لئے دہلی جا رہا ہوں۔ وہاں سے آنے کے بعد مجھے بنگلور جانا ہے اور نریندر مودی کی الوداعی کی تیاریاں کرنی ہیں۔ بی جے پی لیڈران بے تکے بیانات دے رہے ہیں۔ اس مرتبہ اپوزیشن کا اتحاد ایسا ہو گیا ہے کہ وہ نریندر مودی کو مرکز کے تخت سے باہر پھینک دیں گے۔

تیجسوی یادوکے خلاف داخل چارج شیٹ پر پوچھے گئے سوال کا جواب دیتے ہوئے لالو یادو نے کہا کہ چارج شیٹ چاہے کتنی ہی ہو جائے، کوئی فرق نہیں پڑتا۔ ہم ایسی چارج شیٹ کو نظر انداز کر دیتے ہیں۔ تیجسوی یادو کو اس سے کوئی فرق نہیں پڑنے والا ہے۔

آر جے ڈی کے 27 ویں یوم تاسیس پر منعقدہ ایک پروگرام میں لالو پرساد کو نریندر مودی پر براہ راست حملہ کرتے ہوئے دیکھا گیا۔ انہوں نے کہا کہ وہ 2024 کے انتخابات میں نریندر مودی کو جڑ سے اکھاڑ پھینکیں گے۔ ملک کو نریندر مودی کی ضرورت نہیں ہے۔ میں مقدمات سے نہیں ڈرتا۔ کیس کرو، کیس کرو۔ بس یہی ہو رہا ہے۔

اپنے شاندار انداز میں نریندر مودی پر طنز کرتے ہوئے انہیں تنبیہ کی کہ ہمیں پھول مالا بھی مل جا رہا ہے اور جس دن تو نارہب، جانا تارو توہرا کا گت ہوئی، بجھا جائی، سوچ لہ۔

چہارشبہ کے روز آر جے ڈی کے ریاستی دفتر میں شیڈول کاسٹ سیل کی طرف سے منعقد ایک پروگرام میں لالو پرساد نے کہا کہ 23 جون کے بعد ہم پھر سے بنگلور میں اکٹھے ہوں گے۔ 2024 کے انتخابات میں ہم لوگ جیتیں گے۔ بی جے پی کو اقتدار سے اکھاڑ پھینکیں گے۔