حیدرآباد کے مدھورا نگر میں پالتو کتے کے مسئلہ پر حملہ۔تین افراد زخمی: ویڈیو

حیدرآباد: شہرحیدرآباد کے مدھورا نگر پولیس اسٹیشن حدود میں رحمت نگر میں پالتو کتے کے مسئلہ پر دو خاندانوں میں حملہ کے واقعہ میں تین افراد زخمی ہوگئے۔

پولیس کے مطابق مدھوکا خاندان پوسٹل بیلٹ کے ذریعہ اپنا ووٹ ڈالنے جا رہا تھا کہ ان کے پالتو کتے نے مبینہ طور پر حملہ کرتے ہوئے اسی علاقہ میں رہنے والے دھننجئے کے خاندان کے ایک رکن کو کاٹ لیا۔

اس واقعہ میں دونوں خاندانوں کے درمیان ہوئے جھگڑے کے بعد پولیس نے اسی دن مقدمہ درج کر لیا۔اس معاملہ کے سلسلہ میں مدھو کا بھائی سری ناتھ کتے کے ساتھ گھوم رہا تھا۔ اسے دیکھتے ہی دھننجئے اور دیگر نے لاٹھیوں سے سری ناتھ پر حملہ کیا۔

اسے بچانے کی کوشش کرنے والی اس کی ماں راجیشوری اور بہن سوپنا پر بھی حملہ کیا گیا اور کتے کو بھی لاٹھیوں سے مارا گیا۔

اطلاع ملتے ہی پولیس موقع پر پہنچ گئی اور زخمیوں کو علاج کے لیے اسپتال منتقل کیا۔ کتے کو وٹرنری اسپتال بھیجا گیا۔پولیس نے تعزیرات ہند کی مختلف دفعات کے تحت معاملہ درج کرکے جانچ شروع کردی۔