مہاراشٹر حکومت نے ڈیپ فیک ویڈیو کے سلسلہ میں سخت کارروائی کرنے کی دی ہدایات

ممبئی: مہاراشٹر حکومت لوک سبھا انتخابات کے دوران ’ڈیپ فیک‘ ویڈیوز، کلپس، تصاویر یا دیگر مواد بنانے اور اسے سوشل/ڈیجیٹل میڈیا کے ذریعے سرکولیٹ کرنے کو روکنے کے لیے اقدامات کرے گی اور اس میں ملوث افراد کے خلاف سخت کارروائی کرے گی۔

جمعہ کو یہاں جاری ایک سرکاری پریس بیان کے مطابق ’’ڈیپ فیک‘‘ ویڈیوز، کلپس، تصاویر یا دیگر قسم کے مواد کو مختلف ٹیکنالوجیز جیسے کہ فوٹو شاپ، مشین لرننگ (ایم ایل) یا مصنوعی ذہانت (اے آئی) کا استعمال کرتے ہوئے بنایا جاتا ہے۔ انتخابات کے دوران اس ٹیکنالوجی کا غلط استعمال تشویشناک کا موضوع ہے۔

کسی بھی امیدوار، سیاسی جماعت یا انتخابی معاملے کے بارے میں جھوٹی ویڈیوز، آڈیوز، تصاویر بنانا یا حقیقی تصویروں، آڈیوز، ویڈیوز میں ردوبدل کرکے اسے غلط طریقے سے پھیلایا جاتا ہے اور اس طرح کی غیر منصفانہ طور پر بنائی گئی ڈیپ فیک ویڈیوز، کلپس یا تصاویر حقیقی ظاہر ہوتی ہیں۔

 انتخابات کے دوران ایسے معاملات میں اضافہ ہوتا ہے اور اس کو روکنے اور صاف اور شفاف انتخابی عمل کو یقینی بنانے کے لیے حکومت نے ڈیپ فیک بنانے اور پھیلانے والے سماج دشمن عناصر کے خلاف سخت کارروائی کرنے کی ہدایات دی ہیں۔

اس سلسلے میں ریاستی حکومت کی طرف سے ڈائریکٹر جنرل آف پولیس (ڈی جی پی) کو ہدایات دی گئی ہیں اور اس سلسلے میں محکمہ پولیس کے ذریعے کارروائی کی جائے گی۔ بیان میں کہا گیا ہے کہ الیکشن کمیشن (ای سی) نے بھی غلط معلومات کو روکنے کے لیے اپنے رہنما خطوط میں ہدایات دی ہیں۔