کالا جادو کرنے کے شبہ میں ایک شخص کا قتل
پولیس کے مطابق، کومرم راموڈو 3 مارچ کو لاپتہ ہو گیا تھا، جس کے بعد اس کی بیوی لکشمی دیوی نے 16 مارچ کو دموگوڑم پولیس میں شکایت درج کرائی۔
حیدرآباد: تلنگانہ کے بھدرادری کوتہ گوڑم ضلع کے زیڈ ویریا بھدرا پورم گاؤں میں ایک شخص کو کالا جادو کرنے کے شبہ میں اس کے رشتہ داروں نے قتل کر دیا۔ بعد ازاں ملزمین نے پولیس کے سامنے خودسپردگی اختیار کر لی۔
پولیس کے مطابق، کومرم راموڈو 3 مارچ کو لاپتہ ہو گیا تھا، جس کے بعد اس کی بیوی لکشمی دیوی نے 16 مارچ کو دموگوڑم پولیس میں شکایت درج کرائی۔ جانچ کے دوران، کومرم وینکٹیشورا راؤ اور پڈم بالاراجو کو مشتبہ پایا گیا اور پولیس کی جانچ شروع ہوتے ہی دونوں فرار ہو گئے تھے۔
ملزمین نے گاؤں کے ایک بزرگ اور ایک سرکاری ملازم کی مدد سے پولیس کے سامنے خودسپردگی اختیار کی۔ انہوں نے جرم قبول کرتے ہوئے بتایا کہ راموڈو ان کے خاندانوں کو کالا جادو کے ذریعہ نقصان پہنچا رہا تھا، جس پر انہوں نے اسے قتل کر کے اس کی لاش گاؤں کے تالاب میں پھینک دی۔ملزمین کی نشاندہی پر پولیس نے تالاب سے لاش برآمد کر لی۔
