ریلویز کوبچانے مودی حکومت کو ہٹاناہوگا: راہول گاندھی

نئی دہلی: کانگریس قائد راہول گاندھی نے اتوار کے دن الزام عائد کیاکہ مرکز کی بی جے پی حکومت ریلویز کو ناکارہ بناناچاہتی ہے تاکہ اسے ریلویز کو اپنے دوستوں کو فروخت کرنے کا بہانہ مل جائے۔

 انہوں نے عوام سے خواہش کی کہ وہ عام آدمی کا ٹرانسپورٹ کہلانے والی ریلویز کو بچانے کیلئے مودی حکومت کو اقتدار سے بیدخل کردیں۔

راہول گاندھی نے ایکس پر ایک ویڈیوشیئر کیا جس میں لوگوں کو ٹرین میں ٹائلیٹس میں اور فرش پربیٹھ کر سفرکرتے دیکھاجاسکتا ہے۔ کانگریس قائد نے کہا کہ مودی دورِ حکومت میں ریل کا سفرسزا بن چکا ہے۔

مودی حکومت مسافرین کے ہرزمرہ کو ہراساں کررہی ہے۔ انہوں نے دعویٰ کیاکہ کنفرم ٹکٹ کے باوجود لوگوں کو سیٹ نہیں مل رہی ہے۔