مزید موسلاد ھار بارش کی پیش قیاسی، برقی ملازمین کی چھٹیاں منسوخ

حیدرآباد:ریاست میں اگلے دو دنوں تک موسلادھار بارش کی پیش قیاسی کے پیش نظر، سدرن پاور ڈسٹری بیوشن کمپنی آف تلنگانہ لمیٹڈ (ٹی جی ایس پی ڈی سی ایل) کے چیئرمین اور منیجنگ ڈائریکٹر مشرف علی فاروقی نے اپنے ملازمین کی چھٹیاں منسوخ کر دی ہیں۔

انہوں نے کہاکہ تمام عملہ اپنے اپنے دفاتر میں دستیاب ہونا چاہیے۔ عملے اور عہدیداروں کو کوئی چھٹی نہیں دی جائے گی۔انہوں نے کمپنی کے حدودمیں آنے والے حیدرآباد، رنگاریڈی، محبوب نگر، نلگنڈہ، اور میدک اضلاع کے چیف انجینئرس اور سپرنٹنڈنگ انجینئرس کے ساتھ ٹیلی کانفرنس کی اور ان سے کہا کہ وہ چوکس رہیں اور جہاں کہیں بھی بجلی میں خلل واقع ہو، مرمت کریں۔

 انہوں نے عہدیداروں سے کہا کہ وہ ہر سرکل آفس میں کنٹرول روم قائم کریں۔انہوں نے کہاکہ سپرنٹنڈنٹ انجینئر اور ڈویژنل انجینئرس کو ہر گھنٹے بجلی کی فراہمی کی صورتحال کا جائزہ لینا چاہئے۔

 انہوں نے مزید کہا کہ کسی بھی حادثات سے بچنے کے لئے احتیاطی تدابیر کے طور پر مسلسل نگرانی کے لئے عملہ مقرر کیا جائے۔ سی ایم ڈی نے عوام سے کہا کہ وہ گیلے بجلی کے کھمبوں اور تاروں سے دور رہیں اور ایمرجنسی کی صورت میں 1912 پر رابطہ کریں۔