سعودی عرب اور قطر میں دھماکوں کی منصوبہ بندی کرنے والے موساد ایجنٹس گرفتار: امریکی تجزیہ کار کا دعویٰ

واشنگٹن: امریکہ کے قدامت پسند سیاسی تجزیہ کار اور معروف میڈیا ایکٹیوسٹ Tucker Carlson نے ایک سنگین اور چونکا دینے والا دعویٰ کرتے ہوئے کہا ہے کہ سعودی عرب اور قطر کے سیکیورٹی اداروں نے اسرائیلی خفیہ ایجنسی Mossad سے وابستہ مبینہ ایجنٹس کو گرفتار کر لیا ہے۔

ٹکر کارلسن کے مطابق یہ گرفتار شدہ افراد سعودی عرب اور قطر میں بم دھماکوں کی منصوبہ بندی میں مصروف تھے۔ انہوں نے کہا کہ یہ گرفتاریاں گزشتہ رات عمل میں آئیں اور مقامی حکام نے خفیہ کارروائی کے دوران ان نیٹ ورکس کو بے نقاب کیا۔

امریکی تجزیہ کار کا کہنا تھا کہ اسرائیل کی سرگرمیاں صرف ایران تک محدود نہیں رہیں بلکہ وہ مشرقِ وسطیٰ کے دیگر ممالک کو بھی عدم استحکام سے دوچار کرنا چاہتا ہے۔ ان کے مطابق اسرائیل مبینہ طور پر قطر، متحدہ عرب امارات، سعودی عرب، بحرین، عمان اور کویت کو نقصان پہنچانے کی کوششوں میں مصروف ہے۔

ٹکر کارلسن نے دعویٰ کیا کہ اسرائیل اپنے بعض مقاصد میں کسی حد تک کامیاب بھی ہو چکا ہے، جس کے نتیجے میں خطے میں بدامنی، سیاسی کشیدگی اور عدم اعتماد کی فضا پیدا ہوئی ہے۔ انہوں نے کہا کہ مشرقِ وسطیٰ میں جاری حالیہ واقعات ایک منظم حکمتِ عملی کا حصہ معلوم ہوتے ہیں، جس کا مقصد خطے کو مستقل عدم استحکام کا شکار رکھنا ہے۔

https://twitter.com/i/status/2028814587500609662

تاہم، اس معاملے پر سعودی عرب، قطر یا اسرائیل کی جانب سے تاحال کوئی باضابطہ تصدیق یا تردید سامنے نہیں آئی ہے۔ بین الاقوامی مبصرین کے مطابق اگر یہ دعوے درست ثابت ہوتے ہیں تو اس کے خطے کی سلامتی اور عالمی سفارتی تعلقات پر گہرے اثرات مرتب ہو سکتے ہیں۔