غزہ پر اسرائیلی فضائی حملے میں نو فلسطینی شہید

غزہ: وسطی غزہ پٹی میں نصرت پناہ گزین کیمپ کو نشانہ بناکر کئے گئے اسرائیلی فضائی حملے میں کم از کم نو فلسطینی شہید ہو گئے ہیں۔

یہ اطلاع فلسطینی ذرائع نے پیر کو دی۔

سیکیورٹی ذرائع کا کہنا ہے کہ اسرائیلی فضائی حملے میں ایک مکان کو میزائل سے نشانہ بنایا گیا۔ حملے میں مکان تباہ ہوگیا اور آس پاس کے مکانات کو بھی نقصان پہنچا۔

طبی ذرائع نے بتایا کہ فضائی حملے میں نو افراد ہلاک اور متعدد زخمی ہوئے۔ سب کو اسپتال لے جایا گیا۔ اس واقعے پر اسرائیلی فوج کی جانب سے فوری طور پر کوئی تبصرہ نہیں کیا گیا۔

حماس کے میڈیا آفس نے پیر کو ایک بیان میں کہا کہ غزہ پٹی میں گزشتہ 48 گھنٹوں کے دوران اسرائیلی فورسز کی جانب سے بین الاقوامی طور پر ممنوعہ ہتھیاروں کے استعمال کی وجہ سے 320 سے زائد فلسطینی ہلاک یا زخمی ہوئے۔

بیان میں کہا گیا ہے کہ حماس امریکی انتظامیہ کو اس حملے کے لیے قانونی اور اخلاقی طور پر مکمل طور پر ذمہ دار ٹھہراتی ہے کیونکہ اس نے اسرائیلی فورسز کو ’’مختلف قسم کے بین الاقوامی سطح پر ممنوعہ ہتھیار‘‘ فراہم کیے تھے۔

اس دوران حماس کے مسلح ونگ القسام بریگیڈز نے اعلان کیا ہے کہ مغربی غزہ شہر کے تل الحوا محلے میں دو ٹینکوں سے داغے گئے میزائل کے پھٹنے سے کچھ اسرائیلی فوجی ہلاک اور زخمی ہوئے۔

پیر کے روز ہی نزدیکی مشرق میں فلسطینی پناہ گزینوں کے لئے اقوام متحدہ کی ریلیف اینڈ ورکس ایجنسی (یو این آر ڈبلیو اے) نے کہا کہ غزہ میں اس کا ہیڈ کوارٹر میدان جنگ میں تبدیل ہو چکا ہے اور اب اسے منہدم کر دیا گیا ہے۔

یو این آر ڈبلیو اے کے کمشنر جنرل فلپ لازارینی نے سوشل میڈیا پلیٹ فارم ایکس پر کہا کہ’’بین الاقوامی انسانی قانون کی صریح نظر اندازی کا ایک اور واقعہ‘‘۔ اقوام متحدہ کی سہولیات کا ہر حال میں تحفظ کیا جانا چاہیے۔ انہیں کبھی بھی فوجی یا جنگی مقاصد کے لیے استعمال نہیں کیا جانا چاہیے۔‘‘