اوڈیشہ کے سی جی ایس ٹی کے سپرنٹنڈنٹ رشوت لیتے ہوئے گرفتار

بھونیشور: مرکزی تفتیشی بیورو (سی بی آئی) نے جمعہ کے روز اوڈیشہ کے ضلع بالاسور میں مرکزی اشیاء و خدمات ٹیکس (سی جی ایس ٹی) کے ایک سپرنٹنڈنٹ کو ایک شکایت کنندہ سے 50 ہزار روپے رشوت لیتے ہوئے گرفتار کیا۔

اعلیٰ تفتیشی ایجنسی نے 8 مئی کو اس الزام کے بعد مقدمہ درج کیا تھا کہ ملزم سپرنٹنڈنٹ اوم پرکاش نائک نے بالاسور کے سی جی ایس ٹی کے ایک اسسٹنٹ کمشنر کے ساتھ ملی بھگت کر کے شکایت کنندہ کی کمپنی کو تقریباً 16 لاکھ روپے کے جی ایس ٹی ریفنڈ کی منظوری دلانے کے لیے رشوت کا مطالبہ کیا تھا۔

حکام کے مطابق، شکایت کی بنیاد پر سی بی آئی نے جال بچھایا اور ملزم افسر کو رشوت لیتے ہوئے رنگے ہاتھوں گرفتار کر لیا۔ انہوں نے مزید بتایا کہ ملزم کو حراست میں لے لیا گیا ہے اور معاملے کی مزید تفتیش جاری ہے۔