کار کے مشابہ نشانات فہرست سے ہٹادینے کامطالبہ، بی آرایس کی دہلی ہائی کورٹ میں درخواست

حیدرآباد: تلنگانہ کی حکمران جماعت بی آر ایس نے دہلی ہائی کورٹ میں ایک رٹ درخواست دائر کر کے الیکشن کمیشن کو گاڑی جیسے نشانات انتخابی نشانات کی فہرست سے ہٹانے کی خواہش کی ہے۔

درخواست میں کہا گیا ہے کہ الیکشن کمیشن کی آزاد نشانات کی فہرست میں روڈ رولر نما نشانات سے بی آر ایس پارٹی کو نقصان پہنچے گا۔ بی آر ایس نے الیکشن کمیشن سے کہا ہے کہ وہ کسی بھی پارٹی یا امیدوار کو بی آر ایس انتخابی کار سے ملتے جلتے نشانات الاٹ نہ کرے۔

2011 میں الیکشن کمیشن نے روڈ رولر نشان کو ہٹا دیاتھا۔بی آرایس نے آزادع نشانات کی فہرست میں الیکشن کمیشن کی جانب سے اس نشان کو دوبارہ شامل کرنے پر اعتراض کیا۔

بی آر ایس نے الیکشن کمیشن سے اپیل کی ہے کہ آئندہ انتخابات میں روڈ رولر کے علاوہ چپاتی رولر، صابن ڈش، ٹیلی ویژن، سلائی مشین، جہاز، آٹورکشا اور ٹرک کے نشانات بھی کسی کو الاٹ نہ کرے۔

پارٹی کاماننا ہے کہ اس کو ان نشانات سے نقصان پہنچے گا۔ واضح رہے کہ حال ہی میں، بی آر ایس پارٹی نے مرکزی الیکشن کمیشن کی ٹیم کے ریاستی دارالحکومت حیدرآباد کے دورہ کے موقع پر کار کے نشان سے ملتے جلتے نشانات کو ہٹا دینے کی خواہش کی تھی تاہم الیکشن کمیشن نے ابھی تک کوئی جواب نہیں دیا ہے جس پر یہ درخواست ہائی کورٹ میں داخل کی گئی۔