سیاست صرف انتخابات تک ہونی چاہیے ،جیت کے بعد تمام پارٹیاں غریبوں کی خدمت کریں: وزیر ریونیو تلنگانہ

حیدرآباد: تلنگانہ کے وزیر ریونیو پی سرینواس ریڈی نے واضح کیا ہے کہ سیاست صرف انتخابات تک ہونی چاہیے ،جیت کے بعد تمام پارٹیوں کو عوامی حکومت کے حصہ کے طور پر غریبوں کی خدمت کرنی چاہیے۔

انہوں نے زور دے کر کہا کہ عہدہ کوئی اقتدار نہیں بلکہ ایک بڑی ذمہ داری ہے۔ اتوار کو کھمم ضلع کے موضع پیدا تانڈا کے میونسپل دفتر میں ایڈولاپورم کی نو منتخب میونسپل چیئرپرسن پی انیتا کی حلف برداری کی تقریب میں بطور مہمان خصوصی شرکت کرتے ہوئے وزیر موصوف نے نئے منتخب نمائندوں کو اہم ہدایات دیں۔

انہوں نے کونسلرس کو مشورہ دیاکہ وہ صرف کرسیوں تک محدود نہ رہیں بلکہ ہفتہ میں کم از کم پانچ دن، روزانہ دو گھنٹے اپنے وارڈس کا دورہ کریں۔ انہوں نے کہا کہ ہر کام کے لئے صرف فنڈس کی ضرورت نہیں ہوتی، اگر نمائندے خود فیلڈ میں متحرک رہیں تو عہدیدار اور عملہ کی کارکردگی خود بخود بہتر ہو جاتی ہے۔

وزیرموصوف نے ایدولاپورم بلدیہ کو ریاست کے لئے ایک ماڈل بنانے کا عزم ظاہر کرتے ہوئے پینے کے پانی، نکاسی آب اور نالوں پر قبضوں کے خلاف جنگی بنیادوں پر کارروائی کی ہدایت دی۔

بعد ازاں انہوں نے ستیہ نارائن پورم میں ایک مستحق خاندان کی اندرما مکان کی تقریب میں شرکت کی اور اس خاندان کو تحائف پیش کرتے ہوئے یقین دلایا کہ حکومت ہر مستحق غریب کو گھر فراہم کرنے کے لئے پرعزم ہے۔

اس موقع پر وائس چیئرمین ٹی نوین اور دیگر حکام موجود تھے۔