پیپر لیک معاملے پر وزیرِ اعظم مودی کا ردِعمل، سخت قانون اور فاسٹ ٹریک عدالتوں کا اعلان

نئی دہلی: وزیرِ اعظم نریندر مودی نے امتحانات کے پیپر لیک ہونے کے معاملے پر تشویش کا اظہار کرتے ہوئے کہا ہے کہ یہ کوئی معمولی مسئلہ نہیں بلکہ لاکھوں طلبہ اور ان کے والدین کے لیے انتہائی تکلیف دہ معاملہ ہے۔

وزیرِ اعظم مودی نے کہا کہ حکومت نے اپنی پوری طاقت استعمال کرتے ہوئے اس بات کو یقینی بنانے کی کوشش کی کہ طلبہ کی ایک سال کی محنت ضائع نہ ہو۔ انہوں نے بتایا کہ تقریباً 22 لاکھ طلبہ کے امتحانات کامیابی کے ساتھ منعقد کیے گئے۔

انہوں نے کہا کہ پیپر لیک معاملے میں حکومت نے اب تک کئی سخت اقدامات کیے ہیں اور اس معاملے میں ملوث افراد کو گرفتار کرکے جیل بھیجا گیا ہے۔

وزیرِ اعظم نے مزید کہا کہ حکام کو ہدایت دی گئی ہے کہ پیپر لیک کے معاملات کی تیز رفتار سماعت کے لیے فاسٹ ٹریک عدالتیں قائم کی جائیں اور قصورواروں کے لیے سخت سزاؤں کی پالیسی تیار کی جائے۔

مودی نے کہا کہ اس معاملے پر مرکزی کابینہ میں تفصیلی غور کیا جائے گا اور دیگر لوگوں کی تجاویز کو بھی مدنظر رکھا جائے گا۔ اس کے بعد حکومت جلد از جلد پارلیمنٹ کے جاری اجلاس میں متعلقہ بل پیش کرے گی۔

وزیرِ اعظم نے اس عزم کا اظہار کیا کہ حکومت طلبہ کے مستقبل کے تحفظ اور امتحانی نظام میں شفافیت و دیانت داری کو یقینی بنانے کے لیے مزید سخت اقدامات کرے گی۔