دونوں شہروں کے مختلف مقامات پر بارش، عوام کو کچھ دیر کیلئے گرمی سے راحت

حیدرآباد: حیدرآباد اور سکندرآباد کے جڑواں شہروں میں پیر کی دوپہر کے بعد مختلف علاقوں میں اچانک بارش کا سلسلہ شروع ہو گیا، جس سے موسم خوشگوار ہو گیا۔

امیرپیٹ، خیریت آباد، لکڑی کا پل، حمایت نگر، ایس آر نگر، مادھورا نگر، اور کوٹھی کے کئی علاقوں میں اچانک بارش ہوئی، جب کہ پنجہ گٹہ، بشیر باغ، عابڈز، نارائن گوڑہ، چمپا پیٹ، سرور نگر اور ملک پیٹ میں تیز ہواؤں کے ساتھ بارش ریکارڈ کی گئی۔

سکندرآباد کے حدود میں واقع بوئن پلی، تیروملاگیری، الوال، پیٹنی، پیراڈائز، بیگم پیٹ، چلوکل گوڑہ اور ماریڈ پلی سمیت دیگر علاقوں میں بھی ہلکی سے درمیانے درجے کی بارش ہوئی۔

گچی باؤلی کے بعض علاقوں میں ژالہ باری (اولے پڑنے) کی اطلاعات بھی موصول ہوئیں، جس نے شہریوں کو حیران کر دیا۔تیز ہواؤں کے ساتھ بارش کے باعث سڑکوں پر پانی جمع ہو گیا، جس کے نتیجے میں کئی مقامات پر ٹریفک جام ہو گیا۔ گاڑیاں سست رفتاری سے چلتی رہیں، جب کہ کچھ جگہوں پر شہریوں کو شدید مشکلات کا سامنا کرنا پڑا۔

پورا دن گرمی اور حبس کے باعث عوام شدید پریشانی میں مبتلا تھے، تاہم اچانک موسم کے بدلنے اور بارش کی آمد سے شہریوں نے راحت کی سانس لی۔