ویراٹ کوہلی کے فارم میں آنے سے آر سی بی کی پوزیشن مضبوط

بنگلورو: انڈین پریمیئر لیگ (آئی پی ایل) 2025 سیزن میں جمعرات کو ایم چننا سوامی اسٹیڈیم میں رائل چیلنجرز بنگلور (آر سی بی) اور شاندار فارم میں چل رہی دہلی کیپٹلز (ڈی سی) کے درمیان مقابلہ ہوگا۔ کوہلی کا فارم میں ہونا ڈی سی کے لیے ایک بڑی پریشانی کا سبب بن سکتا ہے۔

کل کے میچ میں اس سیزن میں شاندار فارم میں چل رہے آر سی بی کے ہیرو وراٹ پر سب کی نظریں ہوں گی۔ سابق ہندوستانی کپتان نے اس سیزن کے اب تک چار میچوں میں 54.66 کی اوسط اور 143.85 کی اسٹرائیک ریٹ سے 167 رن بنائے ہیں۔ چننا سوامی اسٹیڈیم میں کوہلی کی مہارت سے سبھی واقف ہیں۔ کوہلی آئی پی ایل میں اس میدان پر 3,000 سے زیادہ رن بنا کر ٹاپ پوزیشن میں ہیں۔

اس سیزن میں آر سی بی فی الحال چار میچوں میں تین جیت کے ساتھ پوائنٹس ٹیبل پر تیسرے نمبر پر ہیں۔ وانکھڑے اسٹیڈیم میں ممبئی انڈینز پر 12 رن کی سنسنی خیز جیت کے بعد آر سی بی اس میچ میں اپنی جیت کی راہ کو برقرار رکھنے کے لیے میدان میں اترے گی۔

پچھلے میچ میں پہلے بیٹنگ کرتے ہوئے، آر سی بی نے کوہلی(42 گیندوں پر 67 رن)، رجت پاٹیدار (32 گیندوں پر 64 رن) اور جیتیش شرما (19 گیندوں پر نان آؤٹ 40 رن) کے تعاون سے 221/5 کا بڑا اسکور بنایا تھا۔ تاہم ان کے گیند بازوں نے حوصلہ دکھاتے ہوئے اور کرنل پانڈیا کے چار وکٹوں کے ساتھ ٹیم کے لیے فیصلہ کن کردار ادا کیا۔

بیٹنگ پر زیادہ انحصار کرنے والی بنگلور کی ٹیم اس سیزن میں متوازن نظر آ رہی ہے۔ اس بار جوش ہیزل ووڈ نے گیند بازی میں شاندار کارکردگی دکھائی ہے، انہوں نے چار میچوں میں 7.76 کی اوسط سے 8 وکٹیں حاصل کی ہیں۔

جبکہ یش دیال اور کرنال پانڈیا نے بھی گیند بازی میں اپنے جوہر دکھائے ہیں، جبکہ بھونیشور کمار کے تجربے نے نئی گیند پر بہت کنٹرول کے ساتھ گیند بازی کی ہے۔

دوسری طرف، دہلی نے اب تک پانچ میں سے چار میچ جیت کر ٹاپ پوزیشن پر قبضہ کیا ہے۔ حال ہی میں دہلی نے چنئی سپر کنگز کو اس کے گھر میں 25 رن سے شکست دی تھی۔

اس میچ میں کے ایل راہل نے 51 گیندوں پر 77 رن کی شاندار اننگز کھیلی، جبکہ مشیل اسٹارک نے وکٹ لینے کا سلسلہ جاری رکھتے ہوئے اس سیزن کا اپنا نوواں وکٹ حاصل کیا۔ جبکہ ابھیشیک پوریل، ٹرنسٹن اسٹیبز اور اکشر پٹیل سمیت ڈی سی کا مڈل آرڈر مضبوط ہے۔

اگرچہ آسٹریلوی نوجوان جیک فریزر-میکگرک نے اب تک کے میچوں میں اچھا پرفارم نہیں کیا ہے، لیکن چننا سوامی کی ہموار پچ پر شاید انہیں اس بار موقع مل سکے۔ اکشر کی قیادت میں ٹیم اور بیچ کے اوورز میں چائنامین کلدیپ یادو کی اسپن دہلی کیپٹلز کو سب سے متوازن ٹیموں میں سے ایک بناتی ہے۔

بنگلور میں واقع چننا سوامی اسٹیڈیم کی پچ بلے بازوں کے لیے بہترین ثابت ہوگی۔ چھوٹی باؤنڈریز اور ہموار سطح کی وجہ سے، اس میدان پر بڑےاسکور دیکھے جا سکتے ہیں۔

 یہاں پہلے بیٹنگ کرنے والی ٹیمیں عام طور پر 200 سے زائد کا اسکور بنانے کا ہدف رکھیں گی، خاص طور پر جب اس میدان پر پچھلے چھ آئی پی ایل میچوں میں سے چار میں پہلے بیٹنگ کرنے والی ٹیم نے جیت حاصل کی ہے۔

آر سی بی اور ڈی سی کے درمیان پچھلے کچھ سالوں میں سخت مقابلے دیکھنے کو ملے ہیں۔ حال ہی میں آر سی بی نے پچھلے پانچ میچوں میں سے چار میں جیت حاصل کی ہے اور برتری حاصل کی ہے۔

کل کھیلے جانے والے میچ کا نتیجہ پاور پلے اور ڈیتھ اوورز میں فیصلہ کن ہو سکتا ہے۔ دونوں ٹیموں کے پاس جارحانہ اوپنرز اور تیز رفتار گیند باز ہیں۔ ڈی سی کے پاس چائنامین جیسے اسپنرز بھی ہیں۔

اگر آر سی بی جیتتی ہے تو انہیں ٹاپ دو پوزیشن کے لیے چیلنج مل سکتا ہے، جبکہ ڈی سی نے یہ میچ جیتا تو اس برتری کے ساتھ ان کی پوزیشن مزید مستحکم ہو جائے گی اور لیگ کے باقی میچز آسانی سے کھیل پائیں گے۔

کوہلی کے فارم میں ہونے کی وجہ سے چننا سوامی اسٹیڈیم میں ان کے مداحوں کا جوش و خروش دیکھنے کو ملے گا۔ دوسری جانب بنگلور کی دہاڑ کو خاموش کرنا اور اپنی جیت کی لہر کو برقرار رکھنا ڈی سی کے لیے ایک چیلنج ہو گا۔