دانش علی کیخلاف ریمارکس کا معاملہ، سخت کارروائی کرنے کویتا کا اسپیکر سے مطالبہ

حیدرآباد: بی جے پی کے رکن پارلیمنٹ رمیش بھدوری کی جانب سے بی ایس پی کے رکن پارلیمنٹ دانش علی کے خلاف کئے گئے ریمارکس پر صدمہ اور دکھ کااظہار کرتے ہوئے تلنگانہ کی حکمران جماعت بی آرایس کی رکن قانون ساز کونسل کے کویتا نے لوک سبھااسپیکر اوم برلا پر زوردیا کہ وہ اس معاملہ پر سخت کارروائی کرے۔

دانش علی کے خلاف بھدوری کے ریمارکس پر شدید برہمی دیکھی جارہی ہے۔اسپیکر اوم برلا نے اس طرح کے رویہ کے اعادہ پر سخت کارروائی کرنے کا انتباہ دیاتھا۔

کویتا جو وزیراعلی کے چندرشیکھرراو کی دختر بھی ہیں نے سوشیل میڈیا کے پلیٹ فارم ایکس پر کئے گئے ٹوئیٹ میں کہا”ہمارے ملک کے عظیم قانون ساز ادارہ میں بی جے پی کے رکن پارلیمنٹ بھدوری کی جانب سے رکن پارلیمنٹ دانش علی پر کئے گئے ریمارکس پر دکھ اور صدمہ ہوا۔

اس طرح کے رویہ کی جمہوریت میں کوئی جگہ نہیں ہے۔میں اسپیکر سے درخواست کرتی ہوں کہ وہ فوری طورپر سخت کارروائی کریں۔“انڈیا اتحاد نے اس معاملہ کو مراعات کمیٹی سے رجوع کرنے کامطالبہ کیا۔اسی دوران بی جے پی نے بھدوری کو وجہ نمائی نوٹس جاری کی۔