خراب موسم کے باعث ریونت ریڈی کی پرواز کا رخ حیدرآباد کے بجائے بنگلورو موڑ دیا گیا

حیدرآباد: تلنگانہ کے وزیر اعلیٰ اے ریونت ریڈی کو لے کر حیدرآباد آ رہی پرواز کو جمعہ کی رات خراب موسم کے باعث بنگلورو کی طرف موڑ دیا گیا۔

تلنگانہ کے دارالحکومت حیدرآباد میں راجیو گاندھی بین الاقوامی ہوائی اڈے کے آس پاس تقریباً دو گھنٹے تک تیز بارش، گرج چمک اور بجلی چمکنے کا سلسلہ جاری رہا۔ خراب موسم اور تیز ہواؤں کے پیش نظر احتیاطاً ہوائی اڈے پر طیاروں کی لینڈنگ عارضی طور پر روک دی گئی۔

وزیر اعلیٰ ریونت ریڈی دہلی میں مختلف پروگراموں میں حصہ لینے کے بعد شام 6:30 بجے انڈیگو کی پرواز سے روانہ ہوئے تھے۔ ان کا طیارہ رات 9:15 بجے شمش آباد ہوائی اڈے پر اترنے والا تھا، لیکن خراب موسم کی وجہ سے اسے بنگلورو کی طرف موڑ دیا گیا۔

کانگریس ذرائع کے مطابق وزیر اعلیٰ بحفاظت بنگلورو پہنچ گئے ہیں اور ہفتہ کی صبح حیدرآباد واپس آنے کا امکان ہے۔