راؤڈی شیٹر کالر عمران گرفتار، سوشل میڈیا پر پولیس کے خلاف بے بنیاد الزامات کے بعد کارروائی

حیدرآباد: کالاپتھر پولیس نے راؤڈی شیٹر کالر عمران کو گرفتار کر لیا ہے، جس پر الزام ہے کہ اس نے سوشل میڈیا پر کالاپتھر پولیس اسٹیشن کے انسپکٹر کے خلاف سنگین، بے بنیاد اور گمراہ کن الزامات عائد کیے تھے۔ پولیس کے مطابق عمران کی جانب سے پھیلائی گئی معلومات نہ صرف حقائق کے خلاف تھیں بلکہ انہوں نے پولیس کی ساکھ کو نقصان پہنچانے کی کوشش بھی کی۔

پولیس کا کہنا ہے کہ عمران نے دانستہ طور پر ایسے بیانات دیے جن کا مقصد عوام کو گمراہ کرنا اور پولیس کے خلاف غلط فہمیاں پیدا کرنا تھا۔ یہی وجہ ہے کہ اس کے خلاف قانونی کارروائی کرتے ہوئے اسے حراست میں لیا گیا۔

گرفتاری سے قبل عمران نے سوشل میڈیا پر ایک طویل پوسٹ میں دعویٰ کیا تھا کہ وہ حیدرآباد سٹی پولیس کمشنر وی سی سجنار کا احترام کرتا ہے اور ان سے درخواست کرتا ہے کہ وہ کالاپتھر پولیس اسٹیشن کی حدود کا اچانک دورہ کریں تاکہ "اصل صورتحال” کا جائزہ لے سکیں۔ اس نے الزام لگایا کہ رات کے وقت ہوٹلز بیک ڈور سے کھلے رہتے ہیں، پان شاپس چلتی رہتی ہیں اور جرائم پر کنٹرول نہیں ہے، "صرف شو آف کیا جا رہا ہے۔”

عمران نے SHO خلیل پاشا کے بارے میں بھی سخت الزامات لگاتے ہوئے کہا کہ وہ AIMIM پارٹی کے ہمدرد ہیں۔ اس نے یہ بھی دعویٰ کیا کہ 5 ستمبر 2021 کی رات ایک بجے اس کے گھر پر جو حملہ ہوا تھا، وہ AIMIM کارپورٹرز اور تقریباً 100 افراد کے ساتھ مل کر کیا گیا تھا، جنہوں نے ماسک پہن رکھے تھے۔

اپنی پوسٹ میں عمران نے مزید الزام لگایا کہ اصل میں حملہ کرنے والے SHO نامپلی تھے، جنہوں نے بعد میں اس پر "جھوٹا کیس” درج کیا اور تین دن تک اسے پولیس اسٹیشن کے چکر لگوانے پڑے۔ عمران نے یہ بھی دعویٰ کیا کہ کالاپتھر میں اب بھی اسی طرح کی کارروائیاں جاری ہیں اور اس کی بیل کینسل کروانے کی کوشش کی گئی ہے۔

پولیس نے تمام الزامات کو بے بنیاد قرار دیتے ہوئے کہا ہے کہ عمران کی جانب سے جھوٹی معلومات پھیلانا قانوناً جرم ہے، اور اسی بنیاد پر اسے گرفتار کیا گیا ہے۔ مزید تحقیقات جاری ہیں۔