اگرتلہ: تریپورہ کے ایک شخص کے ساتھ بنگلہ دیشی گرل فرینڈ کے غیر قانونی طور پر ہندوستان میں داخل ہونے پر اسے گرفتار کرکے عدالتی حراست میں بھیج دیا گیا ہے۔
تریپورہ کا ایک شخص اور بنگلہ دیش کی ایک خاتون چہارشنبہ کی رات بنگلہ دیش کے ضلع مولوی بازار سے بارڈر سیکورٹی فورس (بی ایس ایف) کی کڑی نگرانی سے بچ کر اور خاردار تاروں کی باڑھ کو عبور کرکے ہندوستانی علاقے میں داخل ہوئے تھے۔
پولیس کے مطابق بنگلہ دیش سے تعلق رکھنے والی دو بچوں کی ماں 24 سالہ فاطمہ نصرت کو دو ماہ قبل بنگلہ دیش میں قیام کے دوران آسام تری پورہ سرحد پر واقع گاؤں پھولباری کے روایتی رہائشی 34 سالہ نور جلال سے محبت ہوگئی۔ جلال اکثر اپنے پیشے کو آگے بڑھانے کے لئے جڑی بوٹیاں اور پودے خریدنے بنگلہ دیش جاتا تھا۔
نصرت نے پولیس کو بتایا کہ جلال نے فاطمہ نصرت سے مولوی بازار میں اس کے سسرال کی رہائش گاہ پر ملاقات کی اور وہ باقاعدگی سے ملتے رہتے تھے۔
جوں جوں ان کا رشتہ پرانا ہوتا گیا، انہوں نے شادی کرنے کا فیصلہ کیا، لیکن وہ پہلے سے شادی شدہ تھی، اس لئے اگر ان کا رشتہ عام ہو جاتا تو جلال کے لئے پیچیدگیاں پیدا ہو جاتیں۔ نتیجہ یہ ہوا کہ وہ ایک ہفتہ قبل بھاگ کر ہندوستان میں داخل ہوگئے۔
ایک خفیہ اطلاع پر کارروائی کرتے ہوئے پولیس نے جمعرات کو شمالی تریپورہ کے پھولباری میں جلال کے گھر پر چھاپہ مارا اور نصرت کو حراست میں لے لیا لیکن پولیس کی موجودگی کو دیکھ کر جلال فرار ہو گیا۔
بعد ازاں نصرت کو عدالت میں پیش کیا گیا۔ شمالی تریپورہ کے چیف جوڈیشل مجسٹریٹ نے اسے غیر قانونی طور پر ہندوستان میں داخل ہونے کے الزام میں 14 دن کی عدالتی تحویل میں بھیج دیا اور پولیس کو جلال کو گرفتار کرنے کی ہدایت دی۔
او سی چورائے باڑی سمریش داس نے کہا کہ ہم نے نور جلال کے خلاف دھوکہ دہی کا مقدمہ درج کر لیا ہے اور تلاش شروع کر دی ہے۔ انہوں نے کہا کہ پولیس اسمگلنگ اورٹرفکنگ لنکس سمیت دیگر مجرمانہ معاملات کی تحقیقات کر رہی ہے۔
