طلبہ تنظیموں کی 24 جولائی کو تلنگانہ بھر میں تعلیمی اداروں کے بند کی اپیل

حیدرآباد: مختلف طلبہ تنظیموں کے مشترکہ پلیٹ فارم نے نیٹ (NEET) امتحان کے انعقاد میں مبینہ بے ضابطگیوں اور بار بار پیپر لیک کے واقعات کے خلاف 24 جولائی کو تلنگانہ بھر میں تمام تعلیمی اداروں کے بند کی اپیل کی ہے۔ تنظیموں نے ان معاملات کی اخلاقی ذمہ داری قبول کرتے ہوئے مرکزی وزیرِ تعلیم دھرمیندر پردھان کے استعفی کا مطالبہ کیا ہے۔

بند کی اپیل کرنے والی تنظیموں میں اسٹوڈنٹس فیڈریشن آف انڈیا (ایس ایف آئی)، آل انڈیا اسٹوڈنٹس فیڈریشن (اے آئی ایس ایف)، نیشنل اسٹوڈنٹس یونین آف انڈیا (این ایس یو آئی)، پروگریسیو ڈیموکریٹک اسٹوڈنٹس یونین (پی ڈی ایس یو)، آل انڈیا فورم فار ڈیموکریٹک اسٹوڈنٹس (اے آئی ایف ڈی ایس)، آل انڈیا اسٹوڈنٹس بلاک (اے آئی ایس بی) اور آل انڈیا پروگریسیو اسٹوڈنٹس یونین (اے آئی پی ایس یو) شامل ہیں۔

جمعرات کو حیدرآباد میں ایک پریس کانفرنس سے خطاب کرتے ہوئے طلبہ تنظیموں کے نمائندوں نے الزام عائد کیا کہ امتحانی نظام میں مسلسل ناکامیوں نے تعلیمی شعبہ کو سنگین بحران سے دوچار کر دیا ہے۔ انہوں نے مطالبہ کیا کہ نیشنل ٹیسٹنگ ایجنسی (این ٹی اے) کو فوری طور پر تحلیل کیا جائے۔