ناسا کریو-10 کے ارکان کو دیکھ کر سنیتا ولیمز خوشی سے جھوم اٹھیں، بہت جلد زمین پر واپس لوٹیں گے(ویڈیو)

واشنگٹن: ہندوستانی نژاد خلا نورد سنیتا ولیمز اور ان کے ساتھی بوچ ولمور جلد ہی زمین پر واپس لوٹنے والے ہیں۔ انہیں واپس لانے کے لیے ناسا اور اسپیس ایکس کے ذریعہ روانہ کیے گئے کریو-10 کے خلا نورد بین الاقوامی خلائی اسٹیشن (ISS) پہنچ چکے ہیں۔ جیسے ہی کریو-10 کے ارکان اسپیس سینٹر پہنچے، سنیتا ولیمز انہیں دیکھ کر خوشی سے جھوم اٹھیں اور چاروں خلا نوردوں کو گلے لگا کر استقبال کیا۔

قابل ذکر ہے کہ 5 جون 2024 کو سنیتا ولیمز اور ان کے ساتھی بوچ ولمور ISS کے لیے روانہ ہوئے تھے۔ ان کا یہ خلائی مشن 8 دن کا تھا، اور انہیں 10 دن بعد واپس آنا تھا۔ اس مشن کے دوران انہیں خلائی اسٹیشن پر مختلف سائنسی تحقیق اور تجربات انجام دینے تھے۔ اس مشن کا بنیادی مقصد یہ ثابت کرنا تھا کہ اسٹار لائنر اسپیس کرافٹ خلا نوردوں کو خلائی اسٹیشن تک لے جانے اور واپس لانے کی صلاحیت رکھتا ہے۔

لیکن بدقسمتی سے، اسٹار لائنر اسپیس کرافٹ کے تھرسٹر میں خرابی پیدا ہو گئی، جس کی وجہ سے ان کی واپسی میں تاخیر ہوتی رہی۔ ناسا نے بتایا کہ اسپیس کرافٹ کے سروس ماڈیول میں ہلکی سی ہیلیم لیک ہو رہی تھی۔ 25 دن بعد، اسپیس کرافٹ کے کیپسول میں 5 ہیلیم لیک سامنے آئے، اور 5 تھرسٹر کام کرنا بند کر چکے تھے۔ ناسا نے کئی بار اس خرابی کو ٹھیک کرنے کی کوشش کی، لیکن مسئلہ حل نہ ہو سکا، جس کے باعث سنیتا ولیمز اور بوچ ولمور کی واپسی مسلسل تاخیر کا شکار ہوتی رہی۔