تلنگانہ بی جے پی کا ہنگامی اجلاس،انتخابات کے مسئلہ پرتبادلہ خیال

حیدرآباد: تلنگانہ بی جے پی کا ہنگامی اجلاس منعقدہوا جس میں حلقہ اسمبلی جوبلی ہلز کے ضمنی انتخاب اورریاست میں ہونے والے بلدی اداروں کے انتخابات کے مسئلہ پر تفصیلی طورپر تبادلہ خیال کیاگیا۔

پارٹی ہیڈکوارٹرس میں صدررامچندرراو کی زیرصدارت منعقدہ اس اجلاس میں مرکزی وزیرکشن ریڈی کے بشمول بی جے پی کے ارکان اسمبلی اورارکان کونسل نے بھی شرکت کی۔

اجلاس میں آنے والے انتخابات کی تیاری اور امیدواروں کے انتخاب پر تفصیلی بات چیت کی گئی۔ خاص طور پر موجودہ سیاسی حالات کے پیشِ نظر بی جے پی کو اس موقع کو کس طرح بہتر استعمال کرنا چاہیے، اس پر بی جے پی کے قائدین کو رہنمائی فراہم کی گئی۔

رامچندرراو نے ہدایت دی کہ دیہی علاقوں میں ترقی کے لئے مودی حکومت کے منصوبوں کو عوام تک پہنچایا جائے اور آنے والے انتخابات میں تمام قائدین اجتماعی محنت کے ساتھ کام کریں۔

دوسری جانب، جوبلی ہلز کے ضمنی انتخاب کے سلسلہ میں امیدوار کے انتخاب کے لئے پارٹی نے ایک کمیٹی تشکیل دی ہے۔یہ کمیٹی امیدوار کے انتخاب کے سلسلہ میں پارٹی قائدین کی رائے حاصل کرے گی۔