تلنگانہ: نظام ساگر کنال کا پشتہ ٹوٹ گیا، پانی مکانات میں داخل

حیدرآباد: تلنگانہ کے نظام آباد ضلع کے آرمور میں نظام ساگر کنال کا پشتہ ٹوٹ گیا۔یہ واقعہ پیر کی صبح پیش آیا جس کے نتیجہ میں کنال کے قریب واقع جرنلسٹس کالونی کے مکانات میں پانی داخل ہوگیا۔

پانی کے بہاؤ سے بجلی کے کھمبے گر گئے جس کی وجہ سے علاقہ میں بجلی کی سپلائی بند ہو گئی۔مقامی افراد نے اس واقعہ پر شدید برہمی کااظہار کرتے ہوئے کہاکہ محکمہ آبپاشی کے عہدیداروں کی لاپرواہی کے نتیجہ میں کنال کا پشتہ ٹوٹ گیا۔

انہوں نے فوری طورپرراحت کاموں کے آغازکا مطالبہ کیا۔

نظام ساگر پراجکٹ کے ذریعہ تالابوں میں پانی چھوڑنے کے دوران آبپاشی حکام کو اس کنال کی صفائی کرنی ہوتی ہے لیکن آرمور علاقہ میں آبپاشی کے حکام نے اس پر توجہ نہیں دی جس کے نتیجہ میں یہ واقعہ پیش آیا۔