پبلک سروس کمیشن کے گروپ ون پریلمس کو دوبارہ منعقد کرنے تلنگانہ ہائی کورٹ کی ہدایت

حیدرآباد: تلنگانہ ہائی کورٹ نے تلنگانہ پبلک سروس کمیشن (ٹی ایس پی ایس سی) کی جانب سے منعقدہ گروپ ون پریلمس امتحان کو منسوخ کردیا۔

ہائی کورٹ نے ہدایت دی کہ گروپ ون کے پریلمس کو منسوخ کرتے ہوئے یہ امتحان دوبارہ کروایا جائے۔ 11 جون کو ریاست بھر میں یہ امتحان منعقد کیاگیا تھا جس میں 2.32 لاکھ سے زیادہ امیدواروں نے شرکت کی تھی۔

یہ امتحان گروپ ون کی جملہ 503 ملازمتوں کو پُرکرنے کیلئے منعقد کیاگیا تھا۔کئی امیدواروں نے ہائی کورٹ میں درخواست داخل کرتے ہوئے دلیل دی تھی کہ گروپ ون کے پریلمس کو منسوخ کر کے دوبارہ منعقد کرنے کی حکومت کو ہدایت دی جائے کیونکہ اس امتحان میں بائیو میٹرک تفصیلات نہیں لی گئیں۔

امیدواروں نے عدالت کے علم میں لایا کہ ہال ٹکٹ نمبر کے بغیر او ایم آر شیٹس دی گئیں۔ ہائی کورٹ، جس نے اس درخواست کی سماعت کی، پریلمس کو منسوخ کرتے ہوئے دوبارہ امتحان منعقد کرنے کی ہدایت دی۔

واضح رہے کہ گروپ ون کا امتحان اس سے پہلے ایک بار پیپر لیک ہونے کی وجہ سے منسوخ کر دیا گیا تھا۔