تلنگانہ:داداکی موت کا صدمہ،مایوس پوتے نے پھانسی لے لی

حیدرآباد: داداکی موت کا صدمہ برداشت نہ کرتے ہوئے مایوسی کے عالم میں پوتے نے خودکشی کرلی۔یہ واقعہ تلنگانہ کے ضلع رنگاریڈی میں پیش آیا۔

پولیس کے مطابق ناگی ریڈی پلی گاوں کے رہنے والے سی بسپا کی گذشتہ ماہ موت ہوگئی تاہم اس کے پوتے نے دادا کی موت کے صدمہ کو برداشت نہ کرتے ہوئے مایوسی کے عالم میں پھانسی لے کر خودکشی کرلی۔

اس پوتے کی شناخت 22سالہ سی پربھاکر کے طورپر کی گئی ہے۔پربھاکر کے بچپن ہی میں اس کے باپ پرامیاکی موت ہوگئی تھی جس کے بعد اس کے دادانے اس کی پرورش کی تھی۔

پربھاکر، پرگی میں ڈگری فائنل ایر میں زیرتعلیم تھا۔ایک ماہ کے وقفہ سے گھر میں دو اموات پر پربھاکر کے خاندان کے ارکان صدمہ سے دوچار ہوگئے اورگاوں میں غم کی لہردوڑ گئی۔

اس واقعہ کی اطلاع پر مقامی افراد کی بڑی تعداد پربھاکر کے مکان کے قریب دیکھی گئی جنہوں نے ا س کے دیگر ارکان خاندان کو پُرسہ دیا۔

اس بات کی اطلا ع پولیس کو دی گئی جس نے وہاں پہنچ کر پربھاکر کی لاش کو پوسٹ مارٹم کے لئے بھیج دیا۔پولیس نے پربھاکر کی ماں کی شکایت کی بنیاد پر ایک معاملہ درج کرکے جانچ شروع کردی۔