تلنگانہ:مندر پر غیر مجاز ڈرون، دو افراد گرفتار

حیدرآباد: یادادری لکشمی نرسمہاسوامی مندرکے اوپر اڑنے والے غیر مجاز ڈرون کیمرے نے ہلچل مچا دی ہے۔

ایس پی ایف عہدیداروں نے ڈرون اڑانے والے دو نوجوانوں کی شناخت کرتے ہوئے انہیں حراست میں لے لیا۔

ان نوجوانوں کی شناخت تلنگانہ کے سوریا پیٹ ضلع کے میلا چیروو گاؤں کے رہنے والے یوٹیوبرس اے گیندربابو اور اے ناگاراجو کے طورپر کی گئی ہے۔

یہ دونوں گذشتہ شب یادگیر گٹہ مندرپہنچے اور پارکنگ علاقہ سے ڈرون کیمرہ اڑا کر مندر کے اطراف کی فلم بندی کرنے کی کوشش کی۔

ایس پی ایف عہدیداروں نے ان دونوں نوجوانوں کو حراست میں لے لیا اور ڈرون کیمرہ ضبط کرلیا۔

دونوں نوجوانوں کو مقامی پولیس کے حوالے کر دیا گیا۔