تلگو ٹی وی سیریل کے اداکار چندرکانت کی خودکشی

حیدرآباد: معاون اداکارہ پاوترا جیہ رام کی سڑک حادثہ میں ہلاکت کے چند دنوں بعد تلگو ٹی وی سیریل کے اداکار چندراکانت نے یہاں اپنے فلاٹ میں مبینہ طور پر خودکشی کرلی۔

پولیس نے بتایاکہ 39 سالہ اداکار جو پاوترا کی موت کے بعد ڈپریشن کا شکارتھے‘ جمعہ کے روز اپنے فلاٹ میں لٹکتے ہوئے پائے گئے۔

بتایاجاتا ہے کہ اس فلاٹ میں پاوترا بھی رہتی تھیں۔ دونوں میں مبینہ طور پرتعلقات تھے۔ چندرکانت کے والد وینکٹیش نے میڈیا کو بتایاکہ ان کے فرزند چاہتے تھے کہ پاوترا بھی ان کے ساتھ رہے۔

خودکشی کی کوئی تحریر نہیں ملی۔ چندرکانت کے والد نے بیان میں بتایاکہ اداکار چند دنوں سے ڈپریشن میں تھے‘ چند دنوں قبل پاوترا‘ایک سڑک حادثہ میں ہلاک ہوگئی تھیں۔

جمعہ کے روز چندرکانت‘ سکندرآباد میں واقع اپنی رہائش گاہ سے اپنے فلاٹ (الکاپور) پہنچے۔دوستوں نے اداکار سے کئی بار فون پرربط پیدا کرنے کی کوشش کی مگر انہوں نے کوئی جواب نہیں دیا۔

جب دوست ان کے فلاٹ پہنچے تو اداکار کو مردہ پایا۔ پولیس نے یہ بات بتائی۔ نارسنگی پولیس نے کیس درج کرتے ہوئے تحقیقات کا آغاز کردیا ہے۔