دہلی میں درجۂ حرارت میں اضافہ، صبح ہلکی دھند؛ فضائی معیار اب بھی خراب

نئی دہلی: دہلی میں سردی کے کم ہوتے ہی درجۂ حرارت بتدریج بڑھ رہا ہے اور اتوار کی صبح گہری دھند کی جگہ ہلکے کہرے نے لے لی ہے۔

صاف آسمان اور دن کے وقت تیز دھوپ کے باعث درجۂ حرارت میں اضافہ ہو رہا ہے اور موسم خوشگوار گرمی کا احساس دلا رہا ہے، تاہم صبح سویرے اور رات گئے ہلکی سردی اب بھی محسوس کی جا رہی ہے، جبکہ دارالحکومت میں فضائی معیار بدستور تشویش کا باعث ہے۔

ہفتہ کے روز شہر کا اوسط ایئر کوالٹی انڈیکس(اے کیو آئی) 227 ریکارڈ کیا گیا جو خراب زمرے میں آتا ہے۔ اتوار کی صبح اس میں معمولی بہتری دیکھی گئی اور یہ 196 تک گر گیا جو درمیانی درجے میں شمار ہوتا ہے۔

محکمۂ موسمیات کے مطابق شہر میں پورا دن موسم صاف رہنے کی توقع ہے۔ کچھ علاقوں میں صبح کے وقت ہلکی دھند ہو سکتی ہے جس کے بعد دن میں تیز دھوپ نکلے گی اور درجۂ حرارت بڑھنے سے گرمی کا احساس بڑھے گا۔

زیادہ سے زیادہ درجۂ حرارت تقریباً 23 ڈگری سیلسیس رہنے کی توقع ہے جبکہ کم سے کم درجۂ حرارت 10 ڈگری سیلسیس کے آس پاس رہ سکتا ہے۔ سورج غروب ہونے کے بعد درجۂ حرارت دوبارہ کم ہو سکتا ہے جس سے ہلکی سردی کا احساس ہوگا۔

آئندہ ایک ہفتے کے دوران دہلی میں موسم میں کسی بڑی تبدیلی کی پیش گوئی نہیں ہے۔ 9 اور 10 فروری کو جزوی بادل چھائے رہنے اور بعض علاقوں میں صبح کے وقت ہلکی دھند پڑنے کا امکان ہے۔

11 فروری سے موسم زیادہ تر صاف رہنے کی توقع ہے اور 13 فروری تک کوئی موسمی انتباہ جاری نہیں کیا گیا ہے۔

اس دوران درجۂ حرارت میں 1 سے 2 ڈگری سیلسیس تک معمولی اتار چڑھاؤ ہو سکتا ہے۔ دن کے وقت زیادہ سے زیادہ درجۂ حرارت 24 سے 25 ڈگری سیلسیس کے درمیان جبکہ رات کے وقت کم سے کم درجۂ حرارت 9 سے 12 ڈگری سیلسیس کے درمیان رہنے کا امکان ہے۔