حکومت تلنگانہ اور گورنر کے درمیان اختلافات میں شدت

حیدرآباد:حکومت تلنگانہ اورگورنر ڈاکٹر تمیلی سائی سوندرا راجن کے درمیان جاری ٹکراوآج اس وقت مزید شدت اختیار کرگئی جب حکومت گورنر کے رویہ کے خلاف آج سپریم کورٹ سے رجوع ہوئی۔

 چیف سکریٹری تلنگانہ شانتی کماری نے گورنر کی جانب سے 10بلز کو منظوری دینے سے گریز کے خلاف آج سپریم کورٹ میں رٹ پٹیشن داخل کی ہے۔ عرضی میں گورنر کومدعی علیہ بنایاگیا۔ عرضی میں سپریم کورٹ سے درخواست کی گئی کہ وہ گورنر کو جملہ 10 زیر التواء بلز کوفوری منطوری دینے کی ہدایت دیں۔

حکومت کی جانب سے داخل کردہ عرضی میں بتایا گیا کہ ستمبر2022 میں اسمبلی اورکونسل میں منظورہ 3بلز اور فروری 2023 میں منظورہ 3بلز گورنر کے پاس منظوری کے لئے رکھے ہوئے ہیں۔ یہاں اس بات کا تذکرہ ضروری ہے کہ 22 فروری کو گورنر نے تلنگانہ تقرف بل 2023 کو منظوری دئے دی تھی تاہم ابھی دس بلز کو منظوری دینا باقی ہے۔