فلم آدی پورش کے ڈائیلاگ میں تبدیلی

نئی دہلی: فلم ’’آدی پورش‘‘پروڈیوسر نے اتوار کو اعلان کیا کہ عوام اور شائقین کی رائے کو مدنظر رکھتے ہوئے فلم میں کچھ ڈائیلاگ تبدیل کرنے کا فیصلہ کیا گیا ہے۔

فلم کی ٹیم نے ایک بیان میں کہاکہ ’’میکرز فلم کے بنیادی جوہر کو برقرار رکھنے کے لیے ڈائیلاگ میں کچھ تبدیلیوں پر غور کر رہے ہیں اور یہ اگلے چند دنوں میں سینما گھروں کی زینت بنے گی۔

 یہ فیصلہ اس حقیقت کا منہ بولتا ثبوت ہے کہ باکس آفس پر بلا روک ٹوک کمائی کرنے کے باوجود ٹیم اپنے ناظرین کے لیے پرعزم ہے اور شائقین کے جذبات اور سماجی ہم آہنگی سے آگے کچھ نہیں ہے۔‘‘

فلم نے اپنی ریلیز کے پہلے ہی دن بمپر کلیکشن کا آغاز کیا اور یہ سلسلہ جاری ہے اور اس نے دو دنوں میں عالمی سطح پر مجموعی طور پر 240 کروڑ روپے جمع کر لیے ہیں۔

فلم ‘آدی پورش’ کو اوم راوت نے ڈائریکٹ کیا ہے۔ فلم میں پربھاس نے رام، کریتی سینن نے سیتا، سیف علی خان نے راون اور دیودت ناگا نے ہنومان کا کردار نبھایا ہے۔