تلنگانہ میں بجلی کے شعبہ کی صورتحال تشویشناک: نائب وزیراعلی ملوبھٹی وکرامارکا

حیدرآباد: تلنگانہ کے نائب وزیراعلی ملوبھٹی وکرامارکا نے کہا کہ تلنگانہ میں بجلی کے شعبہ کی صورتحال تشویشناک ہے۔

جمعرات کو انہوں نے قانون ساز اسمبلی میں ایک وائٹ پیپر جاری کیا جس میں ریاست تلنگانہ کے قیام کے بعد سے بجلی کی مسلسل فراہمی کے لیے اٹھائے گئے اقدامات کی تفصیلات فراہم کی گئی ہے۔

انہوں نے کہا کہ ریاست میں بجلی کی فراہمی اور پیداوار کے بارے میں سب کو جاننے کے لیے ایک وائٹ پیپر جاری کیا جا رہا ہے۔

انہوں نے کہا کہ بجلی کی فراہمی صنعتوں کی ترقی اور زرعی شعبے کی ترقی کے لیے ریڑھ کی ہڈی کی حیثیت رکھتی ہے۔انہوں نے کہا کہ ٹرانسپورٹ اور مواصلات کے شعبوں کی بقا کے لیے بجلی کی فراہمی بہت ضروری ہے۔

انہوں نے 81 ہزار کروڑ روپے کے قرضوں اور 50 ہزار کروڑ روپے سے زیادہ کے نقصانات اور پاور جنریشن کمپنی (جینکو)، پاور سپلائی کمپنی (ٹرانسکو) کی طرف سے گزشتہ ساڑھے 9 سالوں میں کئے گئے اقدامات کا ذکر کیا۔ اس کے بعد قانون ساز اسمبلی میں بحث شروع ہو گئی۔