حیدرآباد میں نقلی سرٹیفکیٹس کا ریاکٹ بے نقاب، 2 افراد گرفتار
پولیس کے مطابق اس فراڈ میں ان کی مدد وجے واڑہ کے رہنے والے ایک اور شخص، موہن، نے کی۔ یہ گروہ جعلی اسناد کے عوض بھاری رقم وصول کرتا تھا اور بغیر کسی اصل دستاویزات کے سرٹیفکیٹس جاری کرتا تھا۔
حیدرآباد: شمس آباد پولیس نے شہر میں نقلی تعلیمی اسناد تیار کر کے فروخت کرنے والے دو افراد کو گرفتار کر لیا۔ یہ افراد "سری ویا سا کنسلٹنسی” کے نام پر جعلی بی کام (B.Com) اور بی ٹیک (B.Tech) سرٹیفکیٹس تیار کر رہے تھے۔ گرفتار شدگان کی شناخت آکاسپو ہریش اور ماوری مہیش کے طور پر کی گئی ہے، جو کے پی ایچ بی علاقے میں سرگرم تھے۔
پولیس کے مطابق اس فراڈ میں ان کی مدد وجے واڑہ کے رہنے والے ایک اور شخص، موہن، نے کی۔ یہ گروہ جعلی اسناد کے عوض بھاری رقم وصول کرتا تھا اور بغیر کسی اصل دستاویزات کے سرٹیفکیٹس جاری کرتا تھا۔
اب تک کی تحقیقات میں انکشاف ہوا ہے کہ ملزمین نے 46 افراد کو جعلی سرٹیفکیٹس جاری کیے، جن میں سے 24 افراد انہی اسناد کی بنیاد پر بیرونی ممالک کا سفر کر چکے ہیں۔ پولیس نے ان کے قبضے سے دو موبائل فونز اور ایک ڈیسک ٹاپ کمپیوٹر بھی برآمد کیا ہے۔
پولیس نے بتایا کہ جعلی دستاویزات پر ویزے حاصل کرنے والے امیدواروں کی تفصیلات بھی جمع کی جا رہی ہیں۔ گرفتار ملزمین کو کُکٹ پلی پولیس اسٹیشن کے حوالے کر کے ان کے خلاف مقدمہ درج کر لیا گیا ہے اور مزید تحقیقات جاری ہیں۔
