عالمی عوامل پر منحصر ہوگی شیئر بازار کی چال

ممبئی: گھریلو شیئر بازاروں میں گزشتہ ہفتے رہی گراوٹ کے بعد آنے والے ہفتے میں سرمایہ کاروں کی نظر عالمی عوامل اور صنعت کے اعداد و شمار پر رہے گی۔

امریکہ اور ایران کے درمیان امن مذاکرات کے حوالے سے ہر دن الگ الگ بیانات آ رہے ہیں۔ اس سے بازاروں میں بھی اتار چڑھاؤ جاری ہے۔ ایک دن شیئر بازار چڑھتا ہے، اگلے دن پھسل جاتا ہے اور پھر اگلے دن چڑھ جاتا ہے۔

گھریلو سطح پر اپریل کے مہینے کے صنعتی پیداوار کے اعداد و شمار بھی ہفتے کے دوران جاری ہونے ہیں۔ اس سے بھی سرمایہ کاری کے رجحانات متاثر ہو سکتے ہیں۔ بڑی کمپنیوں میں او این جی سی اور انڈیگو کے 31 مارچ 2026 کو ختم ہونے والی سہ ماہی کے مالیاتی نتائج جاری ہونے ہیں۔

گزشتہ ہفتے بی ایس ای کے سینسیکس میں پیر، بدھ اور جمعہ کو تیزی رہی جبکہ منگل اور جمعرات کو گراوٹ رہی۔ سینسیکس 177.36 پوائنٹس (0.24 فیصد) کے ہفتہ وار اضافے کے ساتھ بند ہوا۔ ہفتے کے دوران نیشنل اسٹاک ایکسچینج کا نفٹی-50 انڈیکس بھی 75.80 پوائنٹس یعنی 0.32 فیصد اوپر 23,719.30 پوائنٹس پر بند ہوا۔ درمیانی اور چھوٹی کمپنیوں میں زیادہ تیزی رہی۔ نفٹی مڈ کیپ-50 انڈیکس 1.19 فیصد اور اسمال کیپ-100 انڈیکس 0.41 فیصد چڑھا۔

زیر بحث ہفتے میں سینسیکس کی 30 میں سے 15 کمپنیوں کے شیئرز سبز نشان میں اور دیگر 15 کے سرخ نشان میں رہے۔ انفوسس میں سب سے زیادہ 5.01 فیصد کی تیزی دیکھی گئی۔ ٹرینٹ کا شیئر 4.74 فیصد، ٹیک مہندرا کا 3.76، ایکسس بینک کا 3.25، انڈیگو کا 2.93، ایچ سی ایل ٹیکنالوجیز کا 2.74، ٹی سی ایس کا 2.36 اور بجاج فن سرو کا 2.20 فیصد چڑھا۔ آئی سی آئی سی آئی بینک میں 1.62 فیصد، ریلائنس انڈسٹریز میں 1.37 فیصد اور ایشین پینٹس میں 1.28 فیصد کی تیزی رہی۔ الٹراٹیک سیمنٹ، بجاج فنانس، ایل اینڈ ٹی اور اٹرنل کے شیئرز بھی اوپر رہے۔

پاور گرڈ کا شیئر 3.76 فیصد، ٹاٹا اسٹیل کا 3.51، ہندوستان یونی لیور کا 3.04، آئی ٹی سی کا 2.50 اور ٹائٹن کا 2.10 فیصد گر گیا۔ سن فارما میں 1.85 فیصد، ماروتی سوزوکی میں 1.80، بھارتی ایئرٹیل میں 1.74، بی ای ایل میں 1.66 فیصد، این ٹی پی سی میں 1.65، اسٹیٹ بینک آف انڈیا میں 1.44، مہندرا اینڈ مہندرا میں 1.30 فیصد کی گراوٹ رہی۔ کوٹک مہندرا بینک، اڈانی پورٹس اور ایچ ڈی ایف سی بینک کے شیئرز بھی ہفتہ وار نقصان میں رہے۔